ASNN – Briken Calja, edhe matematikisht i sigurt, Erkand Qerimaj, thjesht për formalitetin. Peshëngritja shqiptare e ka nisur vitin 2020 me synimin madhor, Lojërat Olimpike, që do të mbahen në verë në kryeqytetin e Japonisë, Tokio. Dhe pas një 2019-te të mbushur me optimizëm, ku shtanga kuqezi fitoi plot 37 medalje në arenën ndërkombëtare, që për më tepër ishin të panjollosura nga “gangrena” e dopingut që pati pllakosur këtë sport gjatë 10-vjeçarit të shkuar, në 2020-ën shpresat janë të mëdha që të synohet edhe podiumi historik në Olimpiadë.
Por për shkak të historikut të pakëndshëm me dopingun, peshëngritja shqiptare mund të çojë në Olimpiadën e Tokios vetëm dy sportistë meshkuj dhe tanimë njëri prej tyre, Briken Calja është i sigurt edhe matematikisht për vendin e tij në festivalin më të madh sportiv në planet. Peshëngritësi nga Shërmeni mban hëpërhë vendin e 9-të në renditjen botërore të kategorisë së peshës trupore deri në 73kg, me nj total prej 3,885.4530 pikësh olimpike.
Por, duke qenë se para tij renditen 4 sportistë kinezë, nga të cilët vetëm njëri do të shkoj në Olimpiadë, Calja renditet minimalisht në vendin e 6-të, teksa 8 të parët e renditjes shkojnë automatikisht në Tokio. Ndërkaq, vetëm një hap larg është peshëngritësi tjetër, Erkand Qerimaj, i cili mban hëpërhë vendin e 12-të në renditjen botërore të kategorisë së peshës trupore deri në 81 kg, me një total prej 3,439.2449 pikësh olimpike.
Por, sikundër në rastin e Caljes, edhe në atë të Qerimajt, para tij renditen 4 sportistë kinezë, nga të cilët vetëm njëri do të shkoj në Olimpiadë, ashtu sikundër nuk mund të shkojë në Tokio edhe bjellorusi Petr Asajonak, për shkak të problemeve të vendit të tij me dopingun. Ndërkaq, edhe bullgari Bozhidar Dimitrov Andriiv është në valle për kualifikim në të dy kategoritë e pesheve trupore, dhe, nëse ai nuk zgjedh të shkojë në atë deri në 81 kg, por preferon 73 kg, atëherë peshëngritësi shkodran renditet renditet në versionin më të mirë i 7-ti, e në atë më të keq i 8-ti, teksa 8 të parët e renditjes shkojnë automatikisht në Tokio.
Gjithçka që Qerimaj duhet të bëjë është që të sigurohet që, në Evropianin e prillit të bëjë një paraqitje më të mirë ose të paktën të njëjtë, me peshëngritësit e tjerë të kontinentit të vjetër që gjenden pas tij në renditjen botërore. Përveç kësaj, duhet theksuar se renditja aktuale është përllogaritur mbi 5 nga 6 garat kualifikuese ku kanë marrë pjesë dy sportistët kuqezi dhe, me shtimin në të edhe të pikëve të fituara në turneun e fundvitit në Katar, ku Calja, por sidomos Qerimaj, u paraqitën shumë mirë, renditja e re, që pritet të shpallet më 24 janar 2020, t’i shohë edhe më lart shtangistët shqiptarë.
Duhet theksuar se peshëngritja vazhdon të mbajë barrën kryesore të delegacionit olimpik shqiptar, me 2 sportistë të kualifikuar me normë, teksa vetëm një tjetër, atletja Luiza Gega e ka siguruar këtë të drejtë, ndërsa 4 të tjerët e prej 7 sportistëve që pritet të përfaqësojnë Shqipërinë në këtë Olimpiadë, pritet të shkojnë në Tokio me ftesa.
