ASNN – Kuqezinjtë, presin zyrtarizimin e rezultateve të Botërorittë Peshëngritjes, me sytë nga turnetë kualifikues. Shqipëria ka marrë pjesë me 4 prej sportistëve të saj më të mirë në Botërorin e Peshëngritjes, që po mbahet në Tajlandë dhe tanimë ka nisur edhe numërimi mbrapsht sa i përket kualifikimit për në Olimpiadën e vitit të ardhshëm në kryeqytetin e Japonisë, Tokio. Megjithatë, ndryshe nga më parë, tanimë kanë si ndryshuar si kriteret, ashtu edhe sistemi i kualifikimit për në Lojërat Olimpike.
Në fakt, duhet theksuar se, në atë që ka qenë një periudhë e artë, edhe për shkak të sistemit të kualifikimit, shtanga përbënte një pjesë të konsiderueshme të delegacionit kuqezi në Olimpiadat e fillimit të mijëvjeçarit të ri. Kështu, 2 nga 6 sportistët pjesëmarrës në “Athinë 2004”, 3 nga 11 në “Pekin 2008” dhe 5 nga 11 në “Londër 2012” ishin peshëngritës, por problemet e theksuara me përdorimin e substancave të ndaluara dhe dopingut nisën të ndikonin ndjeshëm.
Dhe në olimpiadën pasardhëse, atë të Rios në 2016-ën, vetëm Briken Calja u kualifikua, ndërsa Evangjelia Veli përfitoi një kuotë shtesë për shkak të pezullimit të Rusisë. Por akoma më keq rrezikon të jetë gjendja në “Tokio 2020”, teksa nuk ka më kualifikim ekipor dhe çdo sportist e siguron vetë vendin në Olimpiadë. Për më tepër, vetë peshëngritjes si sport, i janë kufizuar ndjeshëm kuotat olimpike, për shkak të dopingut, por edhe kategoritë e peshave trupore.
Çka e bën edhe më të vështirë betejën e kuqezinjve për kualifikimin për në Lojërat Olimpike të vitit të ardhshëm. Pas përfundimit të konkurrimit në Botërorin e Tajlandës, i vetmi që mund të cilësohet i sigurt për vendin në Olimpiadën japoneze është Briken Calja, i cili, me medaljen e bronztë në stilin e shkëputjes, por edhe me vendin e 5-të në dygarësh, tanimë renditet në vendin e 8-të në renditjen botërore të futur në përdorim nga Federata Botërore e Peshëngritjes, (IWF).
Ndërkohë, sipas komunikimit me zyrtarët e Federatës Shqiptare të Peshëngritjes, që kthehen të enjten nga Tajlanda, edhe 3 shtangistët e tjerë, Krenar Shoraj, i cili u rendit i 13-ti në botë në kategorinë e peshës trupore deri në 89 kg, Daniel Godelli, i cili u rendit i 16-ti në botë në kategorinë e peshës trupore deri në 81 kg dhe Erkand Qerimaj, i 21-ti në po këtë kategori peshe, kanë marrë pikë të rëndësishme olimpike. Megjithatë, ata do të kenë përsëri shanse të provojnë edhe në 2-3 turne kualifikues, por edhe në Evropianin e vitit të ardhshëm.
