ASNN – Zyrtarizohet ndëshkimi i skajshëm për shtangisten shqiptare për shkak të përdorimit të dopingut. Përtej pretendimeve të vazhdueshme për pafajësi, Romela Begaj është ndëshkuar rëndë nga Federata Botërore e Peshëngritjes, e cila e pezulluar sportisten shqiptare për 8 vjet. Një gjë e tillë është konfirmuar për Rrjetin e Radio-Televizionit Shqiptar nga Federata Shqiptare e Peshëngritjes, e cila ka sqaruar se një vendim i tillë i skajshëm vjen për shkak se Begaj e ka përsëritur shkeljen e përdorimit të substancave të ndaluara.
Romela Begaj është përjashtuar për 8 vjet nga peshëngritja. Shtangistja shqiptare pati rezultuar pozitiv për përdorimin e substancës së ndaluar stanozolol në Botërorin e vitit 2017, ku në peshën deri në 69 kg, ajo mori medaljen e artë në shkëputje dhe u shpall nënkampione e botës në dygarësh. Por rezultimi pozitiv u bë i njohur në fillim të janarit të 2018-ës. Federata Shqiptare e Peshëngritjes konfirmon pezullimin e Begës nga ana e Federatës Botërore (IWF). Në fakt, rasti i saj çoi në tronditjen e peshëngritjes shqiptare.
Presidenti i Federatës Shqiptare të Peshëngritjes Elez Gjoza dha dorëheqjen pak ditë më pas. Begaj pati këmbëngulur vazhdimisht për pafajësinë, teksa sapo ishte kthyer nga një pezullim i mëparshëm dyvjeçar për të njëjtën substancë. Rasti i saj ishte i fundit në shumë raste përdorimi dopingu nga peshëngritësit shqiptare, femra dhe meshkuj, kur Federata Shqiptare e Peshëngritjes drejtohej nga Gjoza.
Skandali i dopingut që goditi Federatën Shqiptare të Peshëngritjes, çoi edhe në anullimin e mbajtjes në Tiranë të Kampionatit Evropian të Peshëngritjes për të Rritur, që duhet të mbahej në javën e fundit të marsit të vitit të kaluar në Tiranë. Ndërsa nën drejtimin e presidentit të ri, Theodhor Masllavica, deri më tani nuk ka patur sportistë që kanë rezultuar pozitivë për doping.
