…vijon nga dje
ASNN – Falë një tjetër bashkëpunimi mjaft të suksesshëm me Rrjetin e Radio-Televizionit Shqiptar, kjo veprimtari, është sjellë për shikuesit drejtpërdrejt nga transmetuesi publik, duke treguar edhe një herë vëmendjen e këtij institucioni në drejtim të sportit dhe eventeve më të rëndësishme të tij. Edhe ky transmetim i drejtpërdrejtë dhe ekskluziv të këtij kampionati ka ndërthurur me komentin e drejtpërdrejtë, me intervistat e herëpashershme me protagonistët.
Po kështu, u ka ofruar shikuesve kënde mjaft interesante të Rivierës shqiptare, të gërshetuara me emocionet sportive. Ndërkaq, aeronautika shqiptare, e drejtuar nga presidenti Renis Tërshana, Sekretari i Përgjithshëm, Artion Vreto, dhe drejtori teknik Alket Islami, e ka mbyllur vitin 2017 në aktivitet. Ka qenë pikërisht turneun “Korça Open”, që u mbajt në fundjavën e parafundit të vitit dhe ishte edhe si një parapërgatitje për Kupën e Botës më 2018-ën.
Në të kanë marrë pjesë 43 pilotë, të cilët kanë përfaqësuar jo vetëm Shqipërinë dhe Kosovën, por dhe Greqinë, Anglinë, Serbinë etj. Madje të gjithë të pranishmit kanë shijuar bardhësinë e borës, apo pamjet piktoreske të juglindjes, sidomos ato të Malit të Moravës. Pavarsisht se kushtet jo të mira atmosferike ndikuan në ditën e parë, dita e dytë ka parë një garim normal, duke shpallur, pas 3 tureve, madje edhe një fluturim shtesë, fituesit.
Ndërkohë në këtë festë të aeronautikës shqiptare nuk kanë munguar edhe personazhe të sportit dhe politikës. Madje i pranishëm ka qenë edhe ministri i Bujqësisë, Niko Peleshi, që si një korçar, për më tepër ish-Kryetari i Bashkisë së Korçës, jo vetëm që ka rrëfyer pse njerëzit e duan dhe e frekuentojnë qytetin e juglindjes, por ka dhënë dhe lajmin më të mirë. “Kupa e Botës 2018, – ka thënë Peleshi, – do të mbahet pikërisht në Korçë”.
Nuk është pak, sepse aeronautika shqiptar ka kaluar një Kampionat Botëror në Llogara, sikurse dhe një kampionat kombëtar, që ishte së bashku me Vlora Open. Të gjitha këto aktivitete, duke premtuar se dhe më 2018-ën, aeronautika do të jetë përsëri në ekranin e televizorit, kanë qenë paketë e programeve sportive në Rrjetin e RTSH-së. Për këtë arsye, aeronautika shqiptare premton të fluturojë edhe më lart në 2018-ën.
