ASNN – Ministria kërkoi brenda 30 qershorit datat e zhvillimit të Asambleve Zgjedhore nëpër Federata. Edhe pse Lojërat Olimpike të Tokios, që duhet të mbaheshin në verën e këtij viti, u shtynë për në verën e vitit të ardhshëm, për shkak të shpërthimit në shkallë globale të epidemisë së virusit korona, 2020 është sidoqoftë viti i fundit i një cikli olimpik.
Kësisoj, ky është edhe vitit në të cilin duhet të mbahen edhe zgjedhjet në federatat e ndryshme sportive në Shqipëri dhe, për këtë arsye, Ministria e Arsimit, Sportit dhe Rinisë, u ka dërguar një shkresë Federatave për ta njoftuar mbi datën e mbajtjes së Asamblesë Zgjedhore. Në fakt, ka patur interpretime se me shtyrjen e Lojërave Olimpike shtyhej edhe mandati i drejtuesve aktual, por të tilla interpretime nuk kanë asnjë bazë ligjore dhe brenda 2020-ës duhet të mbyllet i gjithë cikli i proceseve zgjedhore nëpër Federata.
Aktualisht, vetëm Federata Shqiptare e Volejbollit e ka përmbyllur, madje që në janar të këtij viti, Asamblenë e saj Zgjedhore, duke rikonfirmuar edhe për një mandat presidentin Erlind Pëllumbi dhe ekipin e tij drejtues. Brenda kësaj jave pritet që Federata Shqiptare e Boksit të përmbyllë Asamblenë e saj zgjedhore, ndërsa burime zyrtare të Federatës Shqiptare të Peshëngritjes, kanë pohuar për RTSH Sport se po shqyrtohet mundësia e mbajtjes së Asamblesë Zgjedhore në nëntor të këtij viti.
Siç dihet, në këtë federatë, Presidenti aktual, Theodhor Masllavica, zëvendësoi para dy vjetësh të dorëhequrin Eleze Gjoza, i cili e drejtoi shtangën shqiptar për një mandat e gjysmë, pra vjet. Vetë Gjoza ishte zgjedhur në postin e presidentit të FSHP-së më 2012-ën, pas tërheqjes pas 3 mandatesh të Esat Ademit, që është padyshim një nga drejtuesit më të suksesshëm të kësaj federate sportive deri më tani.
Natyrisht, zgjedhjeve nuk mund t’u shpëtojë brenda 2020-ës as vetë Komiteti Olimpik Kombëtar Shqiptar, i cili është përfshirë prej disa vitesh nga përplasjet brenda tij. Në Asamblenë e fundit të Jashtëzakonshme, të mbajtur në kryeqytet në shkurt, u vendos që procesi zgjedhor të mbyllet brenda dhjetorit të këtij viti. Me pak fjalë, pas epidemisë së virusit “Covid-19”, sporti shqiptar pritet të nisë edhe vallen zgjedhore.
