ASNN – Faza e dytë e kampionatit të Kategorisë Superiore mbyllet të enjten me ndeshjet e javës së 18-të. Vëmendja kryesore e opinionit futbolldashës është përqendruar në Korçë, ku Skënderbeu do të presë Partizanin, në një sfidë tepër të veçantë. Të dyja skuadrat vijnë në këtë ndeshje, me pikë të barabarta, 32.
Skënderbeu-Partizani është supersfida e javës së 18-të të Kategorisë Superiore, jo vetëm për lojën e bukur që dhurojnë futbollistët në fushë, por edhe për fatet e renditjes. Të dyja skuadrat janë me 32 pikë të barabarta dhe ndajnë vendin e dytë e të tretë në klasifikim.
Futbollisti i Partizanit, Emilano Vila, e quan të vështirë sfidën në Korçë, por jo vendimtare për titull. “Ndaj Skënderbeut duhet të zbatojmë vetëm detyrat që na ka caktuar trajneri”, – ka shtuar më tej sulmuesi i të kuqve. Ndërsa pjesa tjetër i takon fushës. Ndeshja Skënderbeu-Partizani, luhet të enjten, në orën 17:00.
