ASNN – Futbollisti i Partizanit, Ekuban, ka fituar çmimin “Futbollisti i Muajit”, dhënë nga Shoqata “Sporti na bashkon”. Sulmuesi i të kuqve ka bërë një paraqitje të mirë me Partizanin, në kampionatin shqiptar, teksa ka shënuar deri tani 9 gola. Kështu, ganezi i lindur në Itali, Ekuban është përzgjedhur si futbollisti i muajit nga Shoqata “Sporti na bashkon”.
Por sulmuesi i Partizanit ka rënë në sy për lojën e tij edhe në Antalja, ku kryeqytetasit kryen fazën përgatitore. Madje, sikundër u tha, disa skuadra kanë dhënë edhe ofertat e tyre për të marrë shërbimet e Ekubanit, por klubi i kuq nuk ka pranuar. Kontrata e tij me Partizanin skadon në qershor 2017, dhe, duke folur për të ardhmen Ekuban përgjigjet: “Ndjehem shumë mirë te Partizani”.
“Edhe me shokët e skuadrës jam përshtatur, – ka vijuar ish-lojtari i Kievos. – Dua të jap maksimumin këtu, në mënyrë që skuadra të arrijë objektivat që i ka vënë vetes. Se çfarë do të ndodhë në fund të kampionatit nuk mund ta parashikoj dot. Janë klubi dhe menaxheri im që do të vendosin. Futbolli është i çuditshëm dhe i paparashikueshëm.” Por, a do ta fitojë Partizani titullin “kampion” këtë sezon?
“E thashë edhe më përpara, që futbolli është i paparashikueshëm, – përgjigjet Ekubani. -Megjithatë, Partizani gjatë dimrit, ka bërë një merkato më të mirë se sa skuadrat e tjera, ndaj do të jetë më i fortë gjatë këtyre dy fazave.” Sulmuesi ka shënuar 9 gola deri tani me Partizanin, por, në ndeshjen e ardhshme, me Luftëtarin do të mungojë për arsye kartonësh.
