ASNN – Ndërkohë që në mbrëmje Kombëtarja e të rriturve përballet në Lihtenshtejn me përfaqësuesen vendase, një tjetër Kombëtare, ajo e Nën-19-vjeçarëve ka luajtur ndeshje e parë në kuadër të grupit të saj eliminator të kësaj grupmoshe. Shqipëria është mundur 0-1 nga Irlanda, në ndeshjen e luajtur në Tiranë dhe të sjellë për sportdashësit drejtpërdrejt nga Rrjeti i Radio-Televizionit Shqiptar.
Të enjten kanë nisur edhe ndeshjet e grupit të 4 Eliminator të Evropianit të Nën-19-vjeçarëve, ku Shqipëria është vendi organizator. Siç dihet, ndeshjet do të luhen në Tiranë dhe Durrës, përkatësisht në Stadiumin “Selman Stërmasi” dhe “Niko Dovana”. Skuadrat që bëjnë pjesë në grupin eliminator janë Gjermania, Republika e Irlandës, Gjibraltari dhe Shqipëria.
Ekipi kombëtar i Nën-19-vjeçarëve, që drejtohet nga trajnerët Arjan Bellai dhe Sulejman Demollari, është mundur në ndeshjen e parë, përballë Irlandës, duke u ndëshkuar nga një 11-metërsh i akorduar për miqtë në pjesën e parë. Në këtë takim, që luajt në drekë dhe u soll për sportdashësit drejtpërdrejt nga Rrjeti i Radio-Televizionit Shqiptar, Shqipëria e Nën-19-vjeçarëve është përpjekur përballë bashkëmoshatarëve të Irlandës, të cilët nga ana e tyre ishin më të disiplinuar taktikisht dhe më kërkues.
Fati i kësaj ndeshjeje do të vendoset në minutat e fundit të pjesës së parë, kur topi i prekur me dorë nga Doksani, ka çuar në një 11-metërsh të shndërruar në gol nga irlandezët. Pjesa e dytë nuk ka sjellë gola të tjerë dhe Shqipëria mundet kështu minimalisht në takimin e parë përballë Irlandës. Takimi i dytë është ai me 8 tetorit me Gjermaninë, ndërsa i fundit ai i 11 tetorit me Gjibraltarin.