ASNN – Shqipëria e Nën-17-vjeçarëve, e drejtuar nga trajneri Ervin Bulku ka nisur që prej ditës së diel grumbullimin zyrtar në prag të dy ndeshjeve miqësore të programuara për muajin shtator. Kuqezinjtë e Bulkut do të luajnë ndeshjen e parë më 22 shtator, në Kosovë ndërsa dy ditë më vonë, do të zhvillojnë një tjetër miqësore kundër ekipit kombëtar të Nën-18-vjeçarëve. Duke folur në prag të këtyre dy ndeshjeve, Bulku theksoi se stafi ende është në fazën e formimit të grupit përfundimtar që do të përfaqësojë Shqipërinë në Eliminatoret e Kampionatit Evropian të kësaj grupmoshe, që do të zhvillohen në Irlandën e Veriut.
Aty shorti e ka vendosur Kombëtaren kuqezi në të njëjtin grup me Italinë, Skocinë dhe Irlandën e Veriut. “Jemi akoma duke formuar grupin, pavarësisht se shumicën e grupit e njohim, – ka thënë trajneri kuqezi. – Në këtë grumbullim kemi 4-5 prurje të reja, me djem shqiptarë që luajnë në kampionate evropiane, si në Greqi dhe në Itali, që luajnë në ekipe si Panathinaikosi, Olimpiakosi, Viçenza dhe Udineze. Shpresojmë që të formojmë grup sa më të mirë, t’i japim mundësi të gjithë lojtarëve dhe të formojmë një grup të mirë për Eliminatoret e Evropianit”.
Për shkak të vështirësive të krijuara nga epidemia, stafi teknik i Kombëtares nuk ka mundur të shohë të gjithë Nën-17-vjeçarët që mund të ishin pjesë e këtij grupi, ndërsa Bulku shprehet se duhet të shohë ende prurjet e reja, pavarësisht se ka krijuar një ide paraprake. “Unë mendoj që shumicën e lojtarëve, pavarësisht vështirësive që kemi pasur prej “Covid-19”-ës, ka lojtarë nga Gjermania ose Zvicra që ne nuk i kemi parë në asnjë moment në lojë, sepse ata kanë qenë në karantinë, – ka vijuar 40-vjeçari. – Kemi zhvilluar një turne në Itali dhe një miqësore me Bosnjë-Hercegovinën, si dhe miqësore me ekipin kombëtar të Nën-18-vjeçarëve.”
“Mendoj që pak a shumë skuadrën e kam në kokë, por duhet të shohim edhe prurjet e reja sepse ndoshta në 2-3 pozicione që ne kemi probleme, pasi kemi edhe çështjen e pasaportave, – ka pohuar ish-futbollisti i njohur. – Shpresojmë që shteti shqiptar të na mirëkuptojë dhe të arrijmë t’i pajisim edhe ata lojtarë me pasaporta dhe ta formojmë grupin sa më të mirë dhe sa më të fortë.” Trajneri shprehet më tej se skuadra është plotësuar ditën e sotme, me lojtarët që i janë bashkuar të gjithë ekipit, ndërsa shpreson që muajin e ardhshëm të ketë më shumë ditë në dispozicion për të përgatitur grupin për në Irlandën e Veriut.
“Skuadra e plotë është vetëm sot, – ka sqaruar Bulku. – Dy lojtarët që kanë ardhur nga Italia, kanë ardhur në orët e vona të darkës, sepse kanë pasur ndeshje me ekipet e tyre. Lojtarët shqiptarë që luajnë në kampionatin shqiptar, për arsye se kampionati shqiptar, nisi këtë javë, ramë dakord me ekipet që t’i lëmë lojtarët që të aktivizohen sepse nuk është një datë zyrtare. Shpresojmë që sot që kemi të gjithë grupin, t’i japim idetë që mendojmë dhe detyrat që do i japim për ndeshjet ndaj Kosovës.”
“Shpresojmë që me mirëkuptimin e FSHF-së, muajin e ardhshëm të kemi një javë më shumë, që të na e mundësojë, siç kemi bërë gjithmonë, që të kemi sa më shumë ditë në dispozicion me grupin, që të bëjmë më të mirën dhe të vendosim skuadrën dhe ta kemi gati për në Irlandë”, – ka përfunduar trajneri i Shqipërisë së Nën-17-vjeçarëve në futboll, Ervin Bulku.
