ASNN – Erzeni ka marrë 3 pikë me mjaft vlera në Kukës, duke fituar me përmbysje ndaj skuadrës vendase. Kjo ndeshje u ndërpre për 25 minuta, për shkak të futjes në fushë të tifozëve vendas. Verilindorët e mbyllën pjesën e parë në epërsi minimale, por dy gola brenda 4 minutash, në të 60-ën dhe në të 64-tën, përmbysën shifrat në favor të shijakasve, por shkaktuan edhe ndërprerjen e lojës për plot 25 minuta, për shkak të futjes së disa tifozëve në fushë.
Rezultati do të mbetet në fuqi edhe në 25 minutat e mbetura dhe ato shtesë dhe Kukës ndjen edhe më tepër rënien nga Kategoria Superiore. Kështu, Erzeni ka mposhtur me përmbysje verilindorët në një “finale” mbijetese të luajtur në “Kukës Arena”, me rezultatin 2-1, në sfidën e vlefshme për javën e 25-të të Kategorisë Superiore. Ishin vendasit që kaluan në epërsi në pjesën e parë me anë të Salamit, i cili realizoi në minutën e 31-të.
Por përmbysja e madhe erdhi në pjesën e dytë me Kahrimanoviç dhe Zekën që shënuan në harkun e 4 minutave, gjë që solli më pas dhe kaosin në lojë, në minutën e 64-t. Tifozët verilindorë, të irrituar u futën në fushën e lojës, gjë që solli ndërprerjen e saj për disa minuta, ku u kërkua boshatisja e stadiumit. Pas marrjes së vendimit të dhënë nga gjyqtari kryesor dhe delegati i sfidës, skuadrat u rikthyen në fushë pas 25 minutash, për të luajtur minutat e mbetura, me rezultatin që nuk ndryshoi.
Kështu Kukësi vazhdon në vendin e fundit, që mori një “shuplakë” të dyfishtë, ku rrezikon dhe dënimin pas sjelljes së gabuar të tifozëve. Nga ana tjetër, Erzeni shpreson te mbijetesa, duke u ngjitur në vendin e 8-të me 26 pikë.
