ASNN – Ngjeshet kreu tek makinat, motorët nuk garojnë si homazh për Paulo Gonçalvesin. Fituesi i Rellit të Dakarit në 2009-ën, Giniel de Viliers, iu afrua edhe më tepër treshe së kreut, të përbërë nga Karlos Sainzi, Naser Al-Atija dhe Stéfan Peterhansel, pas mbylljes së etapës së 8-të të edicionit të këtij viti, teksa motorët me dy dhe 4 rrota nuk garuan në nder të pilotit Paulo Gonçalves, i cili humbi jetën gjatë garës para dy ditësh.

Si makinat, ashtu edhe kamionët garuan së bashku të hënën përgjatë një itinerari prej 477 km, rreth zonës së beduinëve në atë që ishte një nga etapat më të shkurtëra. De Villiers ka vuajtur përgjatë javës së parë të kësaj gare, që organizohet për herë të parë në Arabinë Saudite, por afrikanojugori e ka rritur nivelin e garës së tij dhe e mbylli etapën e 8-të në vend të 4-t, pas francezit Matjë Serradori, ndërsa vendin e dytë e mori ish-piloti i Formulës 1, Fernando Alonso.

De Viliers tanimë mban vendin e 4-t, 53 minuta e 12 sekonda pas spanjollit Karlos Sainz, por kryesimi i fituesit të dyfishtë të kësaj gare është shkurtuar tanimë në vetëm 6 minuta e 40 sekonda nga piloti nga Katari, Al-Atija, ndërsa francezi 13 herë fitues i Dakarit, Peterhansel, është vetëm 13m e 9 sekonda pas vendit të parë, teksa të 3 këta pilotë e mbyllën etapën e 8-të jashtë 8-shes së të parëve.

Etapa e 9-të e garës së Dakarit të këtij viti do të rikthejë të 5 kategoritë nëpër dunat e rërës, duke u drejtuar në lindje, drejt Haradhit dhe duke përshkuar plot 891 kilometra, nga të cilat, 415 kilometra janë pjesë e një etape të veçantë.

Klikoni videon e mëposhtme për kronikën e plotë: