ASNN – Horhe Lorenco triumfon në Çmimin e Madh të Italisë në Moto GP. Piloti spanjolli arriti fitoren e parë sezonale dhe të parën me motorin “Dukati”. Një çlirim për spanjollin që dominoi në Muxhelo, duke triumfuar përpara shokut të tij të skuadrës Andrea Doviciozo dhe “Jamaha”-s së Valentino Rosit. Vetëm vendi i 16-të për kryesuesin e kampionatit Mark Markez që u rrëzua pak xhiro pas nisjes së garës, por arriti ta mbante motorin ndezur. Kampionati rihapet me Rosin që ngjitet në vendin e dytë, 23 pikë larg spanjollit.
Numri 99 më në fund ja doli. Pas një viti e gjysmë vuajtjesh, dyshimesh dhe polemikash, kampioni nga Majorka e ngjiti “Dukati”-n e tij në majën më të lartë të podiumit dhe e bëri pikërisht në Çmimin e Madh të Italisë, në shtëpinë e “Dukati”-t. Pavarësisht se si do të jetë e ardhmja e tij, ky ishte një rezultat mjaft i rëndësishëm për pilotin spanjoll. Lorenco e dominoi garën, që në hapjen e semaforit jeshil arriti të kalonte Rosin dhe, në ndryshim nga garat e tjera, nuk e uli ritmit, duke detyruar të gjithë pilotët e tjerë ta shohin nga larg, përfshirë dhe shokun e skuadrës Andrea Doviciozon.
“Dovi” provoi ti afrohej, por “Dukati Dezmosediçi” i tij, këtë herë kishte diçka më pak se ajo e shokut të tij, dhe në fund rrezikoi që të surprizohej nga një Valentino Rosi disi në hije në nisje të garës, por konkurrues me vendin e tretë. Dhe këtë gjë e tregoi si gjatë garës së kaluar në La Mansh, ashtu dhe gjatë garës së shtëpisë. Pas “rrëshqitjes” në vendin e 6-të, “Doktorit” iu desh fillimisht të parakalonte Danilo Petruçin, që e mbylli garën në vendin e 7-të, dhe, më pas, Andrea Ianonen, që u rendit i 4-ti. Ana tjetër e medaljes në skuadrën e “Jamaha”-s është ajo e Maverik Vinjalesit.
U nis mjaft keq dhe pse ndodhej në vijën e parë pas provave zyrtare dhe nuk u shfaq asnjëherë në gjendje për të luftuar me më të mirët. Katalani kaloi finishin në vendin e 8-të, pas krahëve të Aleks Rinsit me “Suzuki” dhe Kal Kraçlout me “Honda LCR”. Lajmi tjetër i mirë për italianët, por i keq për spanjollët gjatë kësaj fundjave në Toskana, ishte rrëzimi i Mark Markezit. Kryesuesi i Kampionatit Botëror kishte lajmëruar për të zhvilluar një garë të qetë, pa marrë mbi supe rreziqe të mëdha. Por nervat e tradhëtuan dhe rrëshqiti, duke mbërritur vetëm i 16-ti, pasi arriti të mbante motorin ndezur.
Megjithatë, renditja i buzëqesh sërish atij, sepse vendi i dytë dhe i tretë që janë Rosi dhe Vinales, nuk kanë fituar asnjë garë këtë sezon. Në anën tjetër, hija e Doviciozos dhe “Dukati”-t, që ndodhet 29 pikë larg fillon të afrohet tek spanjolli.
