ASNN – “Jamaha” ka prezantuar të enjten dy motorët zyrtarë për Botërorin e Moto GP-së për 2020. Ata u janë besuar dy pilotëve, Valentino Rosi dhe Maverik Vinjales. Synimi i skuadrës japoneze këtë sezon është të fitojë të dy titujt botërorë, për pilotë dhe për motorë. 2020, viti i rikthimit? “Jamaha” ka prezantuar të enjten skuadrën zyrtare që këtë vit do të jetë në kërkim të titujve që vë në dispozicion Moto GP-ja, si dhe për të kaluar “Honda”-n dhe “Dukati”-n.
Kështu, janë shfaqur para publikut dy motorët “M1”, të cilët u janë besuar Valentino Rosit dhe Maverik Vinjalesit. Të dy pilotët do të garojnë së bashku për herë të fundit këtë sezon. Dy “M1” zyrtare, nr. 12 dhe 46, e dy pilotët që do t’i drejtojnë ato. Prezantimi i “Jamaha”-s, është bërë në një garazhet e saj në kompleksin e Sëpangut, në Malajzi, ku skuadrat ndodhen për të bërë testet e para zyrtare. Për skuadrën japoneze ky prezantim ka patur një rëndësi të veçantë.
Jo vetëm për synimet e mëdha që i ka vënë vetes, por edhe se është viti i fundit për Valentino Rosin si pilot zyrtar i saj. Për pilotin italian sigurisht që 2020-ta do të jetë një vit në të cilin ai do të bëjë gjithçka për të fshirë ato që ndodhën dy sezonet e kaluara. Fitorja e munguar e një gare nga 2017-ta në Asen, pra gati 2 vite e gjysmë. Shumë për një kampion si ai.
Për këtë arsye Valentino do të kërkojë me të gjitha mënyrat të arrijë maksimumin dhe të përshëndetet me “Jamaha”-n zyrtare dhe kompaninë japoneze pas një seri fitoresh. Në stafet e pilotëve ka edhe disa ndryshime. Kështu David Munjozit, ka zënë vendin e Silvano Galbuserës në garazhin e dedikuar Valentinos. I konfirmuar është Esteban Garsia, kryemekaniku i Maverik Vinjalesit.
