ASNN – Largohet Ibrahimllari, Allkanjari, Dervishi dhe Brahimaj, vjen Branica Lundraxhiu dhe Pepa. Lushnja është një nga skuadrat më aktive në këtë merkato janari dhe lëvizjet në këtë aspekt kanë qenë me dy kahe. Kështu, më i fundit që ka mbërritur në klubin lushnjar është Klejdi Branica, i cili ndërpreu kontratën me Apoloninë në fund të fazës së dytë dhe ishte një lojtar i lirë. Nuk ka vonuar shumë dhe sulmuesi ka gjetur ekipin e ri, ku do të vazhdojë karrierën e tij. Të enjten, sulmuesi peqinas është prezantuar te Lushnja, ku do të luajë edhe për pjesën në vazhdim të sezonit.
Branica kaloi te Apolonia në merkaton e verës, por aventura aty zgjati shumë pak, kjo edhe për shkak të dëmtimeve që e shoqëruan lojtarin. Tashmë ai ka kaluar te rivalët e Lushnjës, me të cilët ka si objektiv ngjitjen në Superiore. Ndërkaq, të mërkurën, pas firmës në kontratë, klubi lushnjar, nëpërmjet sekretarit Edison Koçi ka prezantuar para tifozëve Emiljan Lundraxhiun. Qendërmbrojtësi vjen për të kompensuar të larguarin Ibrahimllari, që pas pak ditësh do të udhëtojë, për arsye personale dhe familjare, drejt Shteteve të Bashkuara të Amerikës.
Një tjetër i rikthyer tek Lushnja është edhe Brunild Pepa, i cili është zyrtarizuar të hënën dhe vjen pas një sezoni e gjysmë tek Kastrioti. Ndërkohë, pas Ibrahimllarit, Allkanjarit dhe Dervishit, një tjetër futbollist është larguar nga Lushnja dhe bëhet fjalë për qendërmbrojtësin Denis Brahimaj. Kavajasi, i cili pas pak ditësh do të mbushë 22 vjeç, erdhi verën e kaluar te lushnjarët. Ai luajti 5 ndeshje, në total 380 minuta dhe për herë të fundit u aktivizua kundër Shënkollit.
Ndërkaq, Lushnja vazhdon të jetë e grumbulluar në Sarandë, atje ku pritet të vijonë fazën stërvitore dimërore deri në fillimin e javës që i paraprin rinisjes së Kategorisë së Parë. Lushnjarët, që e mbyllën 2019-ën në vendin e dytë të renditjes së grupit B, apo grupit të Jugut, me 25 pikë të marra në 12 javët e para, një më pak sesa Pogradeci kryesues, e nisin 2020-ën me përballjen në fushën e vet me Devollin të shtunën e 25 janarit.
