ASNN – Atletja kuqezi e ul me më tepër se 8 sekonda kohën në garën e zhvilluar të premten në Karlsruhe. Atletja shqiptare Luiza Gega, ka shkëlqyer në Mitingun Ndërkombëtar të Atletikës në Salla të Mbyllura, që u mbajt të premten në Karlsruhe dhe që është pjesë e Turit Botëror të Atletikës. 31-vjeçarja është ngjitur në podium, duke marrë vendin e 3-të dhe medaljen e bronztë.
Por, më tepër se kaq, atletja kuqezi e ka thyer me më tepër se 8 sekonda rekordin e saj të mëparshëm në garën e 3,000 m. Atletika shqiptare e ka nisur mbarë vitin 2020 dhe, pak ditë pasi David Nikolli ka thyer me thuajse 6 sekonda rekordin e garës së 1,500 m në salla të mbyllura, të premten ka qenë radha e një tjetër rekordi për t’u thyer, madje në mënyrë edhe më bindëse.
Atletja shqiptare Luiza Gega ka dëshmuar se faza stërvitore 7-javore e zhvilluar në Kenia ishte mjaft e dobishme dhe shtatshkurtëra ka shkëlqyer në Mitingun Ndërkombëtar të Atletikës në Salla të Mbyllura, që u mbajt në Karlsruhe dhe që është pjesë e Turit Botëror të Atletikës. 31-vjeçarja është ngjitur në podium të premten, duke marrë vendin e 3-të dhe medaljen e bronztë, me kohën 8 minuta, 44 sekonda e 46 të qindtat.
Kjo nënkupton se atletja kuqezi e ka thyer me më tepër se 8 sekonda rekordin e saj të mëparshëm, që ishte me kohën 8 minuta, 52 sekonda e 53 të qindtat dhe që mbahej po prej saj. Në një garë të zhvilluar me një ritëm të lartë, Gega mori vendin e 3-të midis 9 atleteve pjesëmarrëse, duke mbërritur në finish pas etiopianes Fantu Uorku dhe kenianes Kiprop.
Ndërkaq, të shtunën do të jetë radha e Eraldo Qeramës i cili do të synojë në kryeqytetin e Austrisë, Vjenë, të përmirësojë rekordin e tij të garës së 800 m në salla të mbyllura.
