ASNN – Luhen dy takime të tjera të javës së 24-t të Kategorisë Superiore, Skënderbeu, tri “shuplaka” Erzenit, Laçi dhe Dinamo ndahen në paqe. Kështu, Skënderbeu ka arritur të marrë 3 pikë të vlefshme për të synuar “4-shen Finale” ndaj Erzenit, me korçarët që fituan me rezultatin 3-0 në Rrogozinë. I pari që kaloi në epërsi korçarët ishte Frenklini, që në minutën e dytë të ndeshjes.
Por vetëm 5 minuta më vonë, në të 7-tën, ishte Nikaj nga pika e bardhë e 11-metërshit që dyfishoi shifrat. Në pjesën e dytë, Erzeni nuk mund të reagonte ndaj Skënderbeut dhe ishin miqtë më pas të cilët shënuan edhe golin e tretë me Janaqin në minutën e 76-të. Me këtë rezultat, Skënderbeu renditet në vendin e 6-të me 31 pikë, vetëm 3 pikë larg Tiranës së vendit të 4-t.
Nga ana tjetër, Erzeni renditet në vendin e parafundit me 23 pikë. Sfida tjetër e Superiores, e luajtur pasdreke, ishte ajo mes Laçit dhe Dinamos, e cila përfundoi me rezultatin e barabartë 1-1. Laçi barazoi 1-1 me Dinamon në shtëpi në sfidën e vlefshme për javën e 24-të të Superiores, një rezultat që nuk i shërben edhe aq asnjërës prej skuadrave.
Ishin kurbinasit ata që e nisën më kërkues sfidën, duke provuar disa herë në portën e Salit, por pa mundur të gjenin golin e epërsisë, gjë që erdhi nga krahu tjetër, me Denison në rastin e parë të të kaltërve. Në pjesën e dytë, u rritën më shumë luftimet në mesfushë, me shumë lojtarë që u ndëshkuan me kartonë të verdhë. Goli i barazimit erdhi në minutën e 71-të, me Qaton.
Ai lëshoi një predhë nga larg që u ndal në trekëndëshin e portës. Kështu Laçi zbret në vendin e 7-të, me 29 pikë duke qëndruar mes luftës për mbijetesë dhe “4-shes Finale”, ndërsa Dinamo vazhdon në vendin e 5-të me 32 pikë, 2 më pak se Tirana e vendit të 4-t, por me një ndeshje më tepër për të luajtur. Takimi i fundit i javës së 24-t të Superiores është ai që luhet në mbrëmje në Shkodër, midis Vllaznisë dhe Egnatias.
