ASNN – Skënderbeu fiton e hyn në 4-she. Egnatia, vjen një tjetër barazim, Dinamo parakalohet në renditje nga korçarët. Janë luajtur të premten pasdreke dy takimet e para të javës së 26-të të Kategorisë Superiore. Kryesuesja e Superiores është ndalur të premten në barazimin 1-1 në shtëpi përballë Dinamos, në një ndeshje të luftuar. Por vendasit nuk u shprehën si zakonisht në fazën ofensive, ndërsa miqtë u mbrojtën me rregull, pasi kishin udhëtuar me objektivin që të merrnin pikë në një fushë të vështirë.
Golat e Zejnullait dhe Kaçorrit në fillimin e pjesës së dytë e bënë sfidën më të bukur, pasi në fund ekipet u hapën në kërkim të golit të fitores. Megjithatë, asnjëra nuk u tregua e saktë në veprimet para porte, duke shpërdoruar mundësinë për të marrë pikët e plota nga ky duel. Ndërkohë, Skenderbeu ka fituar të premten me Laçin dhe për herë të parë është futur në 4-shen që të çon në “play-off”-in për titullin “kampion”. Korçarët kanë parakaluar në renditje Dinamon, që sot barazoi me Egnatian kryesuese.
Në pjesën e parë kurbinasit patën më shumë shanse për të kaluar në epërsi, por futbollistët nuk arritën të finalizonin si duhet. Ndërsa në të dytën, duhej të vinte minuta e 90-të që të shënohej goli i parë dhe i vetëm i sfidës. Falë një kundërsulmi, Nikaj arriti të zhbllokonte sfidën në minutën e fundit të kohës së rregullt dhe t’i dhuronte 3 pikë shumë të rëndësishme skuadrës së tij. Me këtë fitore, Skënderbeu ngjitet në vendin e 4-të me 37 pikë, ndërsa Laçi mbetet në vendin e 7-të, me 30 pikë.
