ASNN – Janë luajtur të shtunën pasdreke 5 nga ndeshjet e javës së 19-të të nivelit të dytë të Kampionatit Kombëtar të Futbollit, që njihet si Kategoria e Parë. Dhe Bylisi ka fituar dhe kthehet i pari në renditje, ndërsa Besa merr 3 pikë të arta me rivalët. 12 gola kanë prodhuar 5 ndeshjet e së shtunës në Kategorinë e Parë që kanë dhuruar rezultate edhe shumë interesante, teksa kanë kthyer në kryesim të vetëm Bylisin, që triumfoi 2-0 në Lushnje falë dygolëshit të sulmuesit nigerian.
Skuadra e Bellajt ka mundur 2-0 kështu Lushnjën në fushën e kësaj të fundit dhe ecën e qetë drejt kthimit në elitë, falë dy golave të Abubakar Kamarasë. “Festival golash” në Vora-Kastrioti, përballje që përfundoi 4-2 për vendasit. Laçiani Prengaj shkëlqeu me 3 gola, ndërkohë që Vora konfirmohet forcë e tretë e kampionatit, pasi ka konsoliduar vendin e 3-të me një fitore të rëndësishme, 4-2 ndaj Kastriotit, për të mos humbur edhe më shumë hapin e ekipeve që ka përpara, teksa ka fundosur edhe më shumë në luftën për mbijetesë krutanët.
Në luftën për qëndrim në kategori është ngjallur Besa, e cila me fitoren 2-0 ndaj Tomorit ka kapërcyer pikërisht beratasit. Skuadra kavajase siguroi tri pikë të rëndësishme për objektivin mbijetesë falë realizimeve të Eminit dhe Ba. Rrugën e rrjetës e ka gjetur edhe afrimi i fundit, sulmuesi Ba. Edhe dt ndeshjet e tjera u mbyllën me fitoret e skuadrave vendase dhe Apolonia mposhti minimalisht, 1-0, Luzin 2008, aty ku skuadra fierake iu fal golit të Omerit në pjesën e parë. Fiton edhe Burreli me matjanët që thyen 1-0 Korabin.
Suksesi i sotëm ka ngjitur ballshiotët në krye të renditjes me 45 pikë, tri më shumë se AF Elbasani ndjekës, që luan të dielën në fushën e vet ndaj Flamurtarit.
Kategoria e Parë
Java e 19
Të shtunën, 3 shkurt 2024:
BESA – TOMORI 2-0
Shënues: Emini 60’, Ba 79’
APOLONIA – LUZI 2008 1-0
Shënues: Omeri 31’
LUSHNJA – BYLIS 0-2
Shënues: Abubakar 14’, 62’
VORA – KASTRIOTI 4-2
Shënues: Prengaj 19’, 38’, 55’, Tafa 48’ / Marinaj 39’, Kapllani 59’
BURRELI – KORABI 1-0
Shënues: Kastrati 45’
Të dielën, 4 shkurt 2024:
AF ELBASANI – FLAMURTARI (17:00)
