ASNN – “Një skuadër e fortë, që nuk mund të nënvlerësohet dhe ndaj të cilës duhet të kënaqemi edhe me një fitore minimale”. Ky është lajtmotivi që ka përshkuar intervistat ekskluzive që trajneri i Spanjës, Lopetegi, dhe portieri David De Gea, kanë dhënë për Televizionin Shqiptar pas stërvitjes së zhvilluar sonte në “Loro Boriçi”.
Përfaqësuesja spanjolle është stërvitur të shtunën në mbrëmje në Stadiumin “Loro Boriçi” të Shkodrës, dhe, duke folur pas saj ekskluzivisht për Televizionin Shqiptar, trajneri i saj, Lopetegi, e ka vlerësuar Shqipërinë si një skuadër të vështirë. “Shqipëria ka një ekip të mirë, një trajner të mirë dhe një bilanc mjaft të mirë këto vitet e fundit”, – ka thënë ai.
“Natyrisht, po flasim për një skuadër të mirë, madje shumë të mirë dhe kryesuesen e grupit”, – ka shtuar Lopetegi. Të njëjtin mendim me trajnerin ka edhe portieri David De Gea. “Mendoj se një nga pikat më të forta të ekipit të saj është pikërisht kjo, të qenit një skuadër e fortë, me një lojë të mirë në mbrojtje dhe me sulmues të shpejtë, dhe ne duhet të jemi vërtet të mirë nëse duam t’i mundim”, – ka thënë ai.
Si për trajnerin, ashtu edhe për gardianin e portës së iberikëve, ndaj kuqezinjve do të mjaftonte edhe një fitore minimale. “Ne po mendojmë që të luajmë mirë vetëm që të fitojmë, – ka thënë Lopetegi. – Ne duhet të përshtatemi me fushën, të përshtatemi me situatat dhe ta ngremë nivelin tonë që të arrijmë fitoren.”
“Gjëja kryesore është që të fitojmë, 1-0 apo 2-0 s’ka rëndësi, – ka këmbëngulur ndërkohë portieri spanjoll, që militon në Premier Ligën Angleze me Mançester Junajtid. – Ne gjithmonë përpiqemi të luajmë mirë, të mbajmë topin, të shënojmë gola, por kjo s’është gjithmonë e mundur. Gjëja më e rëndësishme është një fitore.”
