ASNN – Kjo fundjavë nuk ka qenë e frytshme vetëm për kuqezinjtë e rritur, por edhe për kuqezinjtë e rinj, që gjithashtu e kanë gjetur rrugën e rrjetës, duke qenë vendimtarë për skuadrat e tyre.

Kështu ka ndodhur me 22-vjeçarët Elvis Maloku dhe Françesko Tahiraj, të cilët e kanë udhëhequr skuadrën e tyre, Aluminij, drejt fitores në javën e 16-të të kampionatit slloven të futbollit.

Skuadra e dy shqiptarëve ka mundur Kërshkan 3-1, dhe, pas vetëm 10 minutash lojë, Maloku krijoi hapësirë për veten në zonë dhe pasoi për Kidriçin, që e kaloi Aluminijin në epërsi.

Ndonëse skuadra vendase barazoi shifrat në minutën e 67-të, 12 minuta më pas, Tahiraj shfrytëzon një kundërsulm të skuadrës së tij dhe fiton duelin me mbrojtjen vendase, duke e mposhtur edhe portierin vendas dhe duke përshëndetur rrjetën.

Skuadra e dy shqiptarëve ka gjetur edhe një gol të 3-të në fund të kohës së rregullt dhe ka marrë 3 pikët që ngjisin në vendin e 6-të të renditjes, me pikë të barabarta, 21, me Domzhalen e vendit të 5-të.

Ky ishte goli i 5-të për Tahirajn në këtë sezon të nivelit më të lartë të kampionatit slloven të futbollit.