ASNN – Është stërvitur i diferencuar, por mbrojtësi kuqezi pritet të kthehet shpejt në fushën e blertë. Asgjë serioze nga dëmtimi i Hysajt, në dyshim vetëm për ndeshjen e radhës. Napoli luajti të dielën kundër Romës, të cilën e mundi me rezultatin 4-1, duke “betonuar” në një farë mase vendin e dytë në renditjen e Serisë A. Në këtë ndeshje u dëmtua mbrojtësi i Kombëtares kuqezi, Elseid Hysaj, i cili u detyrua të zëvendësohej në minutën e 68-të nga Malkuit.
Pas ndeshjes trajneri Ançeloti tha se Hysaj nuk kishte ndonjë shqetësim serioz, por kjo kishte ardhur nga angazhimi që ai ka pasur në ndeshjet e skuadrës kombëtare të Shqipërisë. Në fakt, “Corriere dello Sport” shkruan se Hysaj ka një tërheqje të lehtë muskulare, por pa probleme për vazhdimësinë dhe se mund të mungojë në ndeshjen e radhës por nuk paraqet probleme për vazhdimësinë.
Ndërkohë, të hënën në mbrëmje mediat sportive online në Itali shkruajnë se Hysaj është stërvitur i diferencuar, më saktë ka bërë fizioterapi dhe nuk është stërvitur me grupin. Pikërisht kjo situatë ka nxitur spekulimet për gjendjen e Hysajt, por bashkë me të i diferencuar ka qenë edhe belgu Drajs Mertens. Sidoqoftë, për sa kohë mjekët nuk kanë dhënë detaje të hollësishme, por janë mjaftuar me shprehjen “asgjë serioze”, tregon qartë se Hysaj nuk ka një dëmtim që e penalizon në planin afatgjatë.
Shkodrani me shumë gjasë do të mungojë në ndeshjen e radhës në fundjavë, por ai pritet të kthehet në duelin e javës së ardhshme, për të qenë sërish protagonist me Napolin e tij. Në ndeshjen kundër Romës, Ançeloti i kishte besuar rolin e titullarit në krahun e djathtë të mbrojtjes dhe kjo ishte domethënëse për kapitenin e përfaqësueses kuqezi, që rezultoi i pafat në këtë përballje.
