ASNN – Konfirmohet pjesëmarrja e 5 xhudistëve, një boksiereje, një karateisti dhe një pingpongisti. Ka shkuar në 8 numri i sportistëve që do të përfaqësojnë Kosovën në Lojërat e dyta Evropiane Minsk 2019, që mbahen prej datës 21, deri më 30 qershor në kryeqytetin e Bjellorusisë. Organizatorët e këtyre Lojërave Evropiane i kanë konfirmuar Komitetit Olimpik të Kosovës (KOK) pjesëmarrjen e 5 xhudistëve, Majlinda Kelmendi, Nora Gjakova, Distria Krasniqi, Akil Gjakova dhe Loriana Kuka, të cilët janë kualifikuar me normë.
Distria garon në kategorinë e peshës trupore deri në 48 kilogramë, Majlinda në kategorinë e peshës trupore deri në 52 kg, Nora në kategorinë e peshës trupore deri në 57 kg, Akili në kategorinë e peshës trupore deri në 73 kg, ndërsa Loriana në kategorinë e peshës trupore deri në 78 kg. Trajneri i mirënjohur i Xhudos, Driton Kuka, beson se edhe nga Minsku do të kthehen me medalje. “Normalisht, gjasat janë për medalje dhe besoj që do të kthehemi me medalje, por sa e si, mbetet të shihet”, – ka deklaruar Kuka për faqen zyrtare në Internet të KOK-ut, “noc-kosovo.org”.
“Në xhudo, Lojërat Evropiane janë edhe Kampionat Evropian, domethënë do të jetë shumë garë e fortë”, – ka sqaruar trajneri. Pikërisht në xhudo, Kosova numëron një medalje të bronztë të fituar nga xhudistja Nora Gjakova, në debutimin e saj në edicionin e parë të Olimpiadës Evropiane, “Baku 2015”. Para xhudistëve, por me ftesë, KOK-ut i është konfirmuar edhe pjesëmarrja e boksieres, Donjeta Sadikut, karateistit, Alvin Karaqi dhe pingpongistit, Fatih Karabaxhaku. Afati i dërgimit të konfirmimeve nuk është mbyllur ende dhe në ditët në vijim ka gjasa të vijë në KOK edhe konfirmimi për ndonjë sportist të sporteve tjera.
