ASNN – Botërori i Atletikës në Salla të Mbyllura dhe gara e Formulës 1, dy prej viktimave më të bujshme. Epidemia e “koronavirusit” po krijon pështjellime të konsiderueshme edhe në botën e sportit. Çmimi i Madh i Kinës në Formula 1, që ishte planifikuar të mbahet në Shanghai më 19 prill 2020, është shtyrë zyrtarisht. Kjo epidemi ka çuar edhe në anulimin ose shtyrjen e një numri veprimtarish sportive ndërkombëtare në Kinë, midis të cilave spikat Kampionati Botëror i Atletikës në Salla të Mbyllura, që duhej të mbahej në mars në Nanxhing.
Përveçse ka infektuar mbi 40,000 persona në vetëm 6 javë, duke u marrë jetën mbi 1,000 vetëve deri më tani, në Kinë dhe jashtë saj, epidemia e “koronavirusit” po krijon pështjellime të konsiderueshme edhe në botën e sportit. Çmimi i Madh i Kinës në Formula 1, që është planifikuar të mbahet në Shanghai më 19 prill 2020, ka është shtyrë zyrtarisht. Drejtori administrativ i Formulës 1, Ros Braun pati deklaruar më herët se po shqyrtohej mundësia e caktimit të një date të re, nëse gara nuk do të mund organizohej në datën fillestare.
Hera e fundit që një garë u shty, ishte në vitin 2011, kur Çmimi i madh i Bahreinit u prek nga protestat në kuadër të “Pranverës Arabe”. Të martën pasdite, Federata Botërore e Automobilizmit (FIA), deklaroi se po “e monitoronte nga afër situatën në zhvillim”, ndërsa të mërkurën pasdreke u mësua edhe zyrtarizimi i vendimit për ta shtyrë këtë garë në një datë ende të pacaktuar. Në fakt, në fillim të shkurtit, autoritetet sportive në Shanghai rekomanduan shtyrjen e gjithë veprimtarive sportive në qytet.
Duke lënë mënjanë anulimin apo pezullimin e të gjitha veprimtarive sportive në vend, duhet theksuar se epidemia e “koronavirusit” ka çuar edhe në anulimin ose shtyrjen e një numri veprimtarish sportive ndërkombëtare në Kinë, midis të cilave spikat Kampionati Botëror i Atletikës në Salla të Mbyllura, që duhej të mbahej në Nanxhing nga data 13, deri më 15 mars 2020, por edhe një nga garat e “Formulës E”, që duhej të mbahej në Sanja një javë më pas.
Jo vetëm kaq, por organizatorët e Lojërave Olimpike kanë deklaruar se janë “seriozisht të shqetësuar” për përhapjen e epidemisë së koronavirusit dhe ndikimin që mund të ketë në “Tokio 2020” në Japoni në gusht të këtij viti. Një numër turnesh kualifikues për këtë Olimpiadë, që duhej të mbaheshin në Kinë apo rrotull saj, janë anuluar apo zhvendosur gjetkë.
