ASNN – Trajneri kuqezi pret vendimin e FSHF-së, beson se ka punuar mirë me Kombëtaren. Shqipëria përballet me Armeninë të shtunën në mbrëmje, në atë që mund të jetë ndeshja e fundit e Edoardo Rejës në krye të stolit kuqezi. Dhe, duke folur në konferencën për shtyp të mbajtur të premten, 76-vjeçari shprehu dëshirën për të vazhduar projektin e tij kuqezi. “E kemi thënë shpesh si është situata e kontratës, – ka thënë ai fillimisht. – Unë nuk kam probleme. Sa i përket rritjes së kësaj Kombëtareje, ka qenë rritje konstante.”
“Mendoj se kam bërë një punë të mirë, por nuk më takon mua të gjykoj, – ka vijuar veterani italian. – Ky është një diskutim për mediat e presidentin se është ai që bën konkluzionet. Mendoj se është bërë mirë, duhet vetëm të fshijmë vetëm periudhën e fundit, me Izraelin e Islandën kishte pritshmëri për ndonjë rezultat më shumë. Më vjen keq, ka pasur edhe episode. Nëse do të hiqnim kohët shtesë, mund të ishim në kryesim se aty pësuam gol. Më vjen keq për djemtë e të gjithë. Kjo është situata. Unë ndjej se mund të vazhdoj, por nuk më takon mua të jap vlerësimin.
“Tani po punojmë me të rinjtë, po afrojmë disa, po shoh lojtarët e kampionatit shqiptar dhe do të mundohem të aktivizoj ndonjë, se kanë treguar se mund të jenë pjesë, por janë të rinj, – ka theksuar kreu i stolit kuqezi. – Do t’i shohim e vlerësojmë hap pas hapi me kalimin e kohës. Ndonjë gjë duhet përmirësuar në aspektin e mentalitetit se mungon në pjesë të ndeshjes. E diskutojmë prej kohësh, ishim përmirësuar sa i përket tensionit, por në periudhën e fundit u përsërit. E kemi folur e rifolur, kemi parë videot, jemi të ndërgjegjshëm për defektet e problemet tona.”
“Kohët e fundit disa episode na shkuan keq, edhe në ndeshjen ndaj Italisë kemi bërë më shumë se në ndeshjet e tjera, meritonim ndonjë gol më shumë. Duhej të bënim më shumë edhe në fazën mbrojtëse dhe qetësinë në fazën e konkludimit në portë. Por aty janë karakteristikat e lojtarëve që vendosin se janë ata që të bëjnë gol. Po flisnim me Hysajn për Imobilen, ata janë pa Imobilen prej shumë kohësh, ai është një lojtar që kur gjuan në zonë të bën gol”, – ka përfunduar analizën e tij trajneri i Kombëtares kuqezi, Edoardo Reja.
