ASNN – Shqipëria e trajnerit Kristian Panuçi vazhdon të zhgënjejë. Pas humbjes ndaj Kosovës me rezultatin 0-3 para pak ditës, kuqezinjtë janë mposhtur të dielën edhe nga Ukraina me rezultatin e thellë 1-4 duke zhgënjyer totalisht. Gabime amatoreske dhe loja e dobët e të gjitha reparteve, i shkaktoi humbjen e dytë radhazi Kombëtares kuqezi. Konoplianka dhe Jarmolenko shënuan nga 2 gola për miqtë, ndërsa për Shqipërinë shënoi Emanuele Ndoji. Ky ishte goli i parë me fanellën e Kombëtares për mesfushorin nga Mirdita.
E çoroditur, pa vizion dhe e lodhur. Janë këto fjalët e duhura për të përshkruar Kombëtaren shqiptare të futbollit, jo vetëm në ndeshjen ndaj Ukrainës, por dhe në atë ndaj Kosovës disa ditë më parë. Dy ndeshje të luajtura, 7 gola të pësuar dhe vetëm një i shënuar janë një tregues që Shqipëria e Panuçit është në rënie të lirë. Jo për shkak të mungesës së elementëve, por ndoshta Shqipëria po kthehet në fillimet e saj, larg kohës së lavdishme të Xhovani De Biazit. Dhe faktet janë ato që vërtetojnë më së miri një gjë të tillë.
Një panoramë e shëmtuar dhe sfida e dytë miqësore e zhvilluar ndaj Ukrainës, e humbur 1-4. Një humbje që mund të kishte qenë më e thellë, nëse Berisha nuk do të kishte bërë disa pritje vendimtare. Shevçenko arriti të mposhtë Panuçin me lehtësi, ndërsa Jarmolenko dhe Konoplianka i treguan trajnerit italian se mbrojtja shqiptare “fut ujë”. Dhe kjo u vërtetua në të katër golat e pësuar. Në rastin e parë, ishte Konoplianka që bën çfarë të dojë në zonën tonë dhe kalon të tijët në epërsi. Pa kaluar ende 5 minuta nga goli i pësuar, është radha e Jarmolenkos.
Ai vallëzon brenda zonës për të shënuar golin e dytë për skuadrën e Shevçenkos. Dhe në mbyllje të pjesës së parë, është sërish Jarmolenko që tund për herë të tretë rrjetën kuqezi. Kuqezinjtë janë të demoralizuar, ecin në fushë dhe nuk krijojnë asnjë rast të rrezikshëm. Me fitoren në xhep, trajneri Ukrainës, Shevçenko, eksperimenton në formacion duke lënë hapësirë dhe për djem të rinj si 18-vjecari Shaparenko, që e ka fare të lehtë të manovrojë me topin midis kuqezinjve. Nga ana tjetër, Panuçi nuk di çfarë të bëjë më.
Zëvendësime të dëshpëruara me Cikalleshin dhe Balajn që zunë vendin e Manajt dhe Roshit, por dhe ata vetëm sa enden nëpër fushë. Në minutën e 83-të, është Berisha që shpëton kuqezinjtë nga goli i katërt, gol që nuk do të vonojë. Por fillimisht është Emanuele Ndoji që ngushton diferencën në minutën e 89-të, duke mposhtur portierin Lunin. Dhe pa kaluar 1 minutë lojë, sërish mbrojtja kuqezi tregon cenin e saj me Konopliankën që e ka farë të lehtë të shënojë golin e dytë personal dhe të katërtin në këtë ndeshje për Ukrainën.
Mbyllet kështu me një tjetër humbje të thellë edhe miqësorja e dytë e Kombëtares shqiptare të futbollit, e fundit përpara nisjes së Ligës së Kombeve në shtator. Ndoshta një dush i ftohtë në këtë fillim vape do t’u bënte mirë të gjithëve, përfshirë trajnerin Panuçi, për të rikthyer sërish dëshirën tek kuqezinjtë. Sepse më keq nuk ka ku të shkojë.
