ASNN – Kreu i stolit kuqezi, Edoardo Reja, ka folur në konferencën për shtyp për listën e lojtarëve të grumbulluar para dy sfidave me Hungarinë dhe Poloninë, të vlefshme për Eliminatoret e Botërorit “Katar 2022”. “Nuk dua të bëj konsiderata të tilla, do të luajmë ndaj Hungarisë dhe Polonisë dy ndeshje shumë të forta, për të cilat është e tepërt të flas tashmë, por për mua është e rëndësishme që Shqipëria po rritet, ndeshje pas ndeshje”, – ka thënë ai i pyetur se sa pikë synohen në këto ndeshje.

“Jemi skuadër konkurruese, duhet të kemi parasysh që një humbje do të na largonte nga ëndrra që kemi për të arritur në “play-off”-in e Botërorit, – ka vijuar italiani i stolit kuqezi. – Sigurisht, është e detyrueshme të marrim dy rezultate pozitive në dy ndeshjet e ardhshme, një humbje do të na prishte punë. Këto janë dy ndeshjet vendimtare për të shpresuar deri në fund. Me Poloninë duhet me doemos të fitojmë, është rivali ynë direkt në grup kështu që nuk kemi alternativë tjetër. Nuk më pëlqen të bëj llogari të tilla, para ndeshjeve.”

“Dua që t’i marrim ndeshjet njëra pas tjetrës, – ka theksuar 75-vjeçari. – Tani kemi Hungarinë, një sfidë shumë vendimtare dhe më pas Poloninë. Në rastin më të keq, duhet të paktën të marrim tre pikë në ndeshjen ndaj Polonisë për të ruajtur pozicionin që kemi dhe për të shpresuar deri në fund. Ideale për mua do të ishte 4 pikë në këto dy ndeshje.” Si i shikon Edoardo Reja shanset e Shqipërisë për t’u kualifikuar? “Anglia është skuadra më e mirë në grupin tonë dhe thuajse e ka të sigurt kualifikimin për në Botëror”, – ka thënë ai.

“Duhet të kemi shumë kujdes Poloninë, që për momentin është rivali ynë kryesor, – ka vijuar trajneri italian i Kombëtares së Shqipërisë. – E rëndësishme është që shanset që ne kemi për të arritur në “play-off” varen nga ne, pasi jemi aktualisht të dytët në renditje dhe e kemi ne në dorë. Nëse e mundim Poloninë, jemi në rrugë të mbarë, por aktualisht Shqipëria, Hungaria dhe Polonia, kemi shanse të njëjta për të arritur në fazën “play-off”. Jemi në kondicionin e duhur për të arritur këtë objektiv. Gjithçka varet nga ne.”