ASNN – Shqipëria shkon në Stadiumin mitik “Uembli” të Londrës për të marrë maksimumin në atë ndeshje dhe jo thjesht për të luajtur një ndeshje kundër Anglisë. Ky është mesazhi që ka përcjellë trajneri i Kombëtares, Edoardo Reja, gjatë konferencës për shtyp të mbajtur të enjten në mbrëmje në Londër dhe të sjellë për sportdashësit drejtpërdrejt në RTSH Sport. Duke iu përgjigjur interesit të gazetarëve shqiptarë dhe atyre të huaj, trajneri Reja u shpreh se Anglia është një skuadër shumë e fortë, por Shqipëria do të luajë fort dhe do të kërkojë të marrë rezultat pozitiv në Uembli, ndërsa kërkon që kuqezinjtë të bëjnë një ndeshje perfekte dhe të mos bëjnë gabime.
“Të gjitha ndeshjet luhen për t’i fituar, – ka thënë ai fillimisht. – Sigurisht Anglia është një skuadër me vlera të mëdha, nga pikëpamja individuale dhe kolektive. Mendoj se duhet bërë një ndeshje perfekte. Ne kemi konsideratë, por kemi ardhur për të bërë një figurë të mirë, për të luajtur mirë dhe për të bërë rezultat, siç kemi bërë gjatë gjithë këtij edicioni”, – ka vijuar veterani, i cili është ngacmuar edhe mbi idenë se anglezët frikë nga italianët. “Këtu mendova për Mançinin se Italia ka fituar këtu, ai ka hapur rrugën për ne meqë i sjell fat Italisë dhe italianëve, – është përgjigjur 76-vjeçari. – Ndoshta edhe fati do të kthehet nga ne. Unë e kisha parashikuar Anglinë fituese, por Italia e meritonte.
“Pas golit të parë u duk se Anglia do të bënte edhe 3-4, por pastaj u mbyll, – shtoi ai. – Italia bëri mirë e meritoi të fitonte. Urojmë që të premten fati të jetë në anën tonë se ka gjithmonë një herë të parë.” Megjithatë, trajneri kuqezi ka theksuar se Anglia mbetet një nga ekipet më të mira në botë. “I njohim shumë mirë vlerat e Anglisë, është një kundërshtar për të cilin nuk ka nevojë të flitet gjatë, – ka thënë ai. – Unë kam punuar shumë me skuadrën gjatë javës, për të rregulluar gjërat në aspektin e ekuilibrit. Nuk kam ndërmend që skuadra të zbresë në fushë dhe të presë kundërshtarin gjatë të gjithë kohës, por do të provojmë të krijojmë raste dhe ta vëmë në vështirësi gjatë të gjithë kohës.”
“Sigurisht anglezët janë favoritë, por duhet personalitet nga ana jonë, nga ana e lojtarëve dhe e gjithë skuadrës në një ndeshje të tillë, – ka vijuar italiani i stolit kuqezi. – Fusha është njësoj për të gjithë dhe duhet të luajmë pa frikë. Të bëjmë një ndeshje perfekte, të mos bëjmë gabime, sepse jemi penalizuar në disa ndeshje, sidomos ndaj Polonisë. Duhet të jenë perfektë të gjithë, jo vetëm lojtarët në fushë, por edhe zëvendësuesit të bëjnë maksimumin.” Trajneri italian shpreh keqardhjen edhe për gabimet e bëra rrugës gjatë këtyre Eliminatoreve, por mbetet optimist për një mbyllje të mirë, teksa thotë: “Mendoj se skuadra për atë që ka bërë deri tani ka bërë mjaft mirë.”
“Kemi bërë ndonjë gabim më shumë se sa duhet, sidomos në ndeshjet me Poloninë, se me ndonjë gabim më pak do të ishim sot duke folur për Botërorin, – pohoi Reja. – Edhe pse nuk është thënë ende fjala e fundit, kemi ende mundësi, por duhet të fitojmë, edhe pse ka pak shanse, do të mundohemi t’i realizojmë.” Më tej, trajneri i Kombëtares është pyetur rreth formacionit të mundshëm për ndeshjen e së premtes, por edhe për Armando Brojën. “Nuk mund të them se kush luan sot, jam mësuar t’ua them formacionin lojtarëve në ditën e ndeshjes, – është përgjigjur ai. – Dyshimet janë gjithmonë, por kemi punuar shumë mirë ndaj kam vështirësi zgjedhje, uroj dhe shpresoj që nesër të hedh në fushë ekipin më të mirë.”
“Sa i përket Brojës, qëndroi këtu të kurohej për kaviljen, por sot e nesër do të shohim se si është, do të jetë në fushë apo jo, – ka shtuar italiani. – Nuk është titullar, por do të shohim gjendjen e tij.” Në vijim ai është pyetur edhe për stërvitjen larg “Uemblit” që Shqipëria zgjodhi të zhvillojë, por edhe për mundësinë e Cikalleshit kapiten. “Kishte shumë rrugë për të bërë rreth 1 orë e gjysmë nga hotelit te stadiumi, – ka sqaruar trajneri. – Edhe nga aeroporti ishte 2 orë e gjysmë nga hoteli, ishim gjithë ditën rrugës ndaj gjetëm këtë zgjidhje praktike që nuk ndryshon gjërat. Cikalleshi kapiten? Jo, do të dëshiroja të ndryshoja sjelljen, të flisnin pak të gjithë, jo vetëm kapiteni.”
“Ishte e drejtë që të njiheshin të gjithë, në varësi të momentit, se si është situata e njërit apo tjetrit”, – ka shtuar Edoardo Reja, i cili është pyetur edhe mbi gjasat që Shqipëria e tij të korrë një fitore historike të premten. “Uembli është tempulli i futbollit, prej shumë vitesh e njoh këtë realitet dhe jam shumë mik i Kapelos dhe ai më ka treguar se çfarë përfaqëson Uembli për futbollin ndërkombëtar, ndaj do të jem i emocionuar, – ka pohuar ai. – Ka të drejtë Cikalleshi se kur luhet në këto stadiume duhet të tregosh të gjithë karakterin tënd. Mançini ka fituar, Kapelo ka shënuar gol dhe Italia fitoi 1-0 këtu. Nuk ka 2 pa 3, ndaj urojmë që të vijë rezultati edhe për ne. E di që do të ishte e vështirë, por mrekullitë me raste ndodhin.”
