ASNN – Prurjet e reja nuk mungojnë në Kombëtare, teksa këtë herë trajneri Edoardo Reja ka vendosur të thërrasë në ekip tre debutues. Një prej tyre është Kristjan Asllani, i cili i është bashkuar ekipit në këtë grumbullim që ka nisur prej ditës së hënë në Spanjë në kuadër të dy ndeshjeve miqësore që Shqipëria do të zhvillojë ndaj përfaqësueses vendase më 26 mars në fushë të huaj e më pas ndaj Gjeorgjisë në Tiranë, më 29 mars, në Stadiumin “Arena Kombëtare”.

Nga grumbullimi i Kombëtares, mesfushori kuqezi që më parë ka qenë pjesë e Shpresave dhe që luan në Serinë A me skuadrën e Empolit përmes një videomesazhi për mediat sociale të FSHF shprehet i lumtur që është bashkuar me ekipin e të rriturve, teksa premton se do të japë maksimumin për fanellën kuqezi. Në fund, Asllani nuk harron të përshëndesë as tifozët shqiptarë. “Jam Kristjan Asllani, sapo i jam bashkuar ekipit kombëtar”, – thotë ai fillimisht.

“Jam shumë i lumtur, do të jap maksimumin për këtë fanellë. Një përqafim të gjithë tifozëve shqiptar”, – përfundon Asllani në videomesazhin e tij, të postuar në rrjetet sociale.