ASNN – Në ditën e fundit të stërvitjes në Perro Girek të Kombëtares shqiptare, dy lojtarët që kanë dalë në konferencë për shtyp kanë qenë Migjen Basha dhe Ergys Kaçe. Ky i fundit ka deklaruar se i shikon të forta njësoj të tre skuadrat e grupit. Ergys Kaçe mund të jetë njëri nga lojtarët e fundit të cilët i janë bashkuar kombëtares shqiptare në përgatitjet për Evropianin, pas impenjimeve me skuadrën e PAOK-ut në ndeshjet e “play-off”-it, por mesfushori thotë se është në formë të mirë dhe gati për të ndihmuar skuadrën.
Në sfidën e fundit miqësore ndaj Ukrainës, Kaçe e nisi ndeshjen si titullar, por një të tillë nuk e ka të sigurt për sfidën ndaj Zvicrës. Por, Kaçe thotë se po punon maksimalisht dhe se do të respektojë vendimet e trajnerit. “Ndjehem mirë fizikisht, nuk kam asnjë problem, – ka thënë ai. – Sa i përket formacioni ajo është një ekskluzivitet i trajnerit. Ai do të vendos se kush do të luajë. Ne jemi 23 lojtarë dhe e dimë që jo të gjithë do të luajmë. Mendoj se për aq minuta sa do të jem do të ndihmoj skuadrën.”
I pyetur për gjasat e Shqipërisë në këtë veprimtari, Kaçe mendon se nëse kombëtaren luan në të njëjtën mënyrë sikurse ka bërë gjatë Eliminatoreve, atëherë mund ta kalojë grupin. “Tashmë e kemi dëshmuar se jemi një skuadër e mirë, – ka thënë futbollisti i PAOK-ut të Selanikut në Greqi. – Të tre kundërshtarët janë shumë të fortë, por nëse do të luajmë si grup, ashtu siç kemi bërë gjatë Eliminatoreve, atëherë mund të bëjmë gjëra të mëdha.”
Mesfushori zgjodhi Shqipërinë para Greqisë para 3 vitesh dhe thotë se ndihet i lumtur për zgjedhjen, pasi është bërë pjesë e historisë me kualifikimin për herë të parë të kombëtares kuqezi në Evropian.
