ASNN – Stërvitje futbolli nuk do të thotë vetëm në fushën e blertë, por edhe në blerimin e pyllit. Kështu ka ndodhur me Kombëtaren shqiptare, që mori një fitore 3-1 në ndeshjen miqësore të së dielës ndaj Katarit. Vetëm një ditë më pas trajneri De Biasi nuk e ka ulur përqendrimin e kuqezinjve, por ka vijuar programin e tij.
Futbollistët e kombëtares janë kthyer praktikisht në alpinistë apo ushtarë, në një park pranë kampit ku po stërvitet kombëtarja kuqezi. Një mënyrë për të shkrydhur futbollistët, por edhe për t’i mbajtur në formë të mirë fizike në atë që mund të konsiderohet si ditë pushimi pas miqësores së luajtur.
Faza e programit në Austri ka qenë e ngjeshur dhe sigurisht seanca të tilla argëtuese vlejnë pozitivisht te grupi. Kjo është një praktikë e ushtruar edhe nga skuadrat e mëdha që zgjedhin sporte zbavitëse për të çlodhur futbollistët por mbi të gjitha për ti dhënë qetësi psikologjike në prag të një evenimenti të rëndësishëm si Evropiani.
Ditën e martë, De Biazi do të vendosë për listën përfundimtare me 23 lojtarët që do të marrë në Francë, ndërsa të premten do të zhvillohet edhe ndeshja miqësore me Ukrainën.
