ASNN – Karateja do të jetë, për herë të parë, pjesë e kalendarit të Lojërave Olimpike në 2020-tën. Në debutimin e këtij sporti në festivalin më të madh sportiv në planet ëndërrojnë të jenë edhe karateistët e Kosovës. Dhe janë jo pak, por 4 sportistë që synojnë ta arrijnë Tokion nëpërmjet normës olimpike.
Fortesa Orana, Herolind Nishevci, Alvin Karaqi dhe Orges Arifi është 4-shja që po stërvitet fort, nën drejtimin e të mirënjohurës Shqipe Zogjani, për ta bërë realitet këtë ëndërr. Të 4 sportistët, që marrin çdo muaj bursë olimpike nga Komiteti Olimpik i Kosovës, kanë premtuar maksimumin.
Pavarsisht një dëmtimi, prej të cilit kthehet në mars, edhe Karaqi e sheh normën olimpike si një mision të mundshëm. Për trajneren Zogjani, të 4 këta sportistë kanë potencial olimpik.
