ASNN – Sporti shqiptar i ka dhënë lamtumirën e fundit, Ymer Pampurit. Ai është kampioni i vetëm botëror në vend. Në Olimpiadën e Berlinit, në 1972, ka thyer edhe rekordin  olimpik në stilin e forcës në peshëngritje. Ministria e Arsimit dhe Sportit i ka dhënë titullin “Mjeshtër i Madh”.

Kështu, Ymer Pampurit i është dhënë lamtumira e fundit të enjten. Homazhet në nder të figurës së shquar të sportit shqiptar, janë bërë në mjediset e Agjencisë së Shërbimeve të Sportit në Ish-Kompleksin Sportiv “Dinamo”. Familjarë, miq, bashkëkohës së Pampurit, përfaqësues të Ministrisë së Arsimit dhe Sportit, Komitetit Olimpik Shqiptar, Federatës Shqiptare të Futbollit, sportistë e trajnerë të peshëngritjes, kanë nderuar kampionin botëror të shtangës.

Ymer Pampuri është sportisti i vetëm shqiptar që ka fituar titullin “kampion bote”. Në Olimpiadën e Berlinit në 29 gusht 1972, në stilin e forcës, në konkurrimin në peshën 60 kg, arrin të ngrejë 127.5 kg, duke vendosur rekord olimpik. Në të njëjtën kohë shpallet edhe kampion i botës.

Duhet kujtuar këtu se atë vit nuk u zhvilluar Kampionati Botëror i Peshëngritjes dhe, për këtë arsye, gara e Olimpiadës shërbeu edhe si Botëror i shtangës. Më pas, në shkëputje dhe shtytje, shqiptari shtatshkurtër renditet përkatësisht në vendin e 12-të dhe të 10-të. Në përfundim të konkurrimit në tregarësh, Ymer Pampuri renditet në vendin e 9-të.