ASNN – Ish-qendërmbrojtësi që e kishte veshur 28 herë fanellën e Anglisë vdiq në moshën 76-vjeçare. Norman Hanter, legjenda e klubit anglez të futbollit, Lids Junajtid, ka ndërruar jetë të premten pas një beteje me koronavirusin. Ai ishte shtruar në spital si i infektuar me “Covid-19” në fillim të këtij muaji. Një zëdhënës i Lidsit, tha se klubi shpreh ngushëllimin për këtë lajm të trishtuar.
“Ai lë një boshllëk të madh në familjen e madhe të Lidsit, pasi trashëgimia e tij nuk do të harrohet kurrë dhe mendimet tona shkojnë tek familja dhe miqtë e Normanit në këtë kohë të vështirë”, – shtoi zëdhënësi i klubit anglez. Hanteri, i cili u shua në moshën 76-vjeçare, ka luajtur 726 ndeshje në 15 vjet në “Elland Road”.
Në skuadrat e famshme të drejtuara nga trajneri Don Revi, ai fitoi titullin e kampionit të Anglisë (ish-Divizionit të Parë) në 1969-ën dhe 1974-ën, si dhe Kupën e Anglisë (FA Cup) më 1972-shin, Kupën e Ligës Angleze, por edhe dy herë trofeun e Kupës së Panaireve Ndërqytetase të Evropës, pararendësen e ish-Kupës UEFA, tanimë Ligës së Evropës.
Vetëm 3 lojtarë të Lidsit, Xhek Çarltoni, Billi Bremneri dhe Pol Rini, kanë luajtur më shumë ndeshje sesa Norman Hanteri. Ky i fundit, që konsiderohej si një nga qendërmbrojtësit më të mirë të kohës së tij, e ka veshur edhe 28 herë fanellën e përfaqësueses së Anglisë.
Edhe pse ai ishte pjesë e përfaqësueses së Anglisë në Botërorin e 1966-ës, ai nuk luajti, por sidoqoftë iu dha medalja në vitin 2009. Karakteri i tij luftarak në fushë i kishte siguruar atij nofkën e “kafshuesit të këmbëve” dhe Norman Hanteri është tashmë padyshim një pjesë e historisë së futbollit anglez.
