ASNN – Trajnerët Grima dhe Fazlija dhe kapitenia kuqezi, Doçi analizojnë ndeshjen Shqipëri-Kosovë. Shqipëria dhe Kosova e kanë nisur me një barazim 1-1 midis tyre fushatën eliminatore të Kampionatit Botëror të 2023-shit dhe, si për trajnerin kuqezi, Armir Grima, ashtu edhe për kapitenen Megi Doçi, vajzat kuqezi kanë humbur dy pikë. “Kishim shpresuar ta nisnim me një fitore, sepse ishte e rëndësishme për ne dhe mundësitë i patëm, por u ndëshkuam atëherë kur nuk duhej dhe nuk u ngritëm më”, – ka thënë trajneri kuqezi.
“Sigurisht që jam e lumtur për golin e shënuar por do të kisha qenë më e lumtur nëse ai do të kishte vlerën e fitores”, – ka thënë Doçi. Ndërsa për trajneren e Kosovës, Afërdita Fazlija, barazimi ishte një rezultat i drejtë. “Në pjesën e parë luajtëm më mirë dhe mund të kishim bërë më shumë, por, për vetë mënyrën sesi erdhi loja, edhe një pikë është e pranueshme. Për trajnerin Grima, Shqipëria vuajti qartësinë në finalizim. Ndërsa për homologen Fazlija, ndeshja kundër Shqipërisë është gjithnjë e vështirë.
Takimi Shqipëri-Kosovë, që u luajt në Stadiumin “Elbasan Arena”, është sjellë për sportdashësit drejtpërdrejt nga Rrjeti i Radio-Televizionit Shqiptar në kanalin RTSH Sport. Kështu, Kombëtarja shqiptare e femrave ka zhvilluar sonte ndeshjen e parë ndaj Kosovës, të vlefshme për Eliminatoret e Kampionatit Botëror “Australi-Zelandë e Re 2023”. Sfida që u zhvillua në stadiumin “Elbasan Arena” përfundoi me barazimin 1-1. Vajzat kuqezi zhvilluan një ndeshje të mirë, duke krijuar disa raste dhe duke u treguar kërkuese që në minutat e para të lojës.
Goditja e parë e rrezikshme do të vinte në minutën e 13-të, kur Endrina Elezaj do të gjuante një top të fortë drejt portës kundërshtare, por që përfundon sipër rrjetës. Disa minuta më vonë, provon edhe sulmuesja Mimoza Hamidi, por topi kalon mbi kuadratin e portës. Lojë e mirë për vajzat kuqezi, që kërkojnë rrjetën kundërshtare. Në minutën e 35-të, tenton edhe Esmeralda Franja, që godet bukur me kokë brenda zonës, por topi nuk përfundon në rrjetë. 7 minuta më vonë, gjyqtarja akordon një 11-metërsh në favor të skuadrës kuqezi, pasi Megi Doçi pengohet brenda zonës.
Doçi vendos ta marrë vetë përsipër ekzekutimin e 11-metërshit, duke e kthyer në gol dhe duke kaluar në epërsi ekipin kuqezi. Në fraksionin e dytë të ndeshjes, skuadra kuqezi e menaxhon mirë lojën, duke tentuar të ruajë rezultatin 1-0. Ekipi i Kosovës bën disa zëvendësime në këtë pjesë, teksa në minutën e 72-të gjen golin e barazimit me Valentina Limanin, e cila shfrytëzon bukur një pasim të Mehmetit. 5 minuta më vonë, Grima vendos të hedhë në fushë Sara Begallon, duke dalë nga fusha Mimoza Hamidi.
Rezultati nuk ndryshon deri në fundin e lojës, me vajzat kuqezi që pavarësisht rezultatit zhvilluan një ndeshje të mirë. Shqipëria e nisi lojën me këtë formacion: Rexhepi, Hilaj, Curraj, Maliqi, Elezaj, Krasniqi, Franja, Gjini, Doçi, Hamidi, Maksuti.
