ASNN – Në prag të dy sfidave eliminatore, të vlefshme për Kampionatin Evropian 2021-2022 të futbollit të femra për grupmoshën e Nën-17-vjeçarëve, që do të zhvillohen të gjitha në Shqipëri, në stadiumin “Elbasan Arena”, pasi UEFA i ka besuar sërish një tjetër organizim ndeshjesh me nivel evropian Federatës së Futbollit, kanë folur për mediat dy lojtaret e ekipit kuqezi, Rea Maxhalaku dhe Arlinda Kodra.
Kjo e fundit nuk e fsheh emocionin që është pjesë e këtij grumbullimi, ndërsa thekson se objektivi i Kombëtares në këto dy ndeshje është të kryesojë grupin B dhe të marrë dy fitore në këto dy sfida. Kodra flet edhe për ëndrrat në aspektin personal, ku shpreson të jetë së shpejti pjesë e Kombëtares A. “Unë jam lojtare e Vllaznisë dhe kjo është hera ime e dytë që grumbullohem me Kombëtaren”, – thotë ajo fillimisht.
“Jam shumë e emocionuar, pasi të jesh e grumbulluar me ekipin Kombëtar është një kënaqësi shumë e madhe, – ka vijuar Arlinda. – Atmosfera në skuadër? Në grup atmosfera është shumë e mirë dhe me vajzat jemi shumë të lidhura. Kjo besoj do të na ndihmojë edhe për ndeshjet e ardhshme.” Ajo ka folur më pas për pritshmëritë në këto sfida, duke thënë: “Për këto dy ndeshje, objektivat janë të marrim 6 pikët dhe të kryesojmë në grupin B.”
“Dy kundërshtarët që ne do të përballemi nuk janë të lehtë por besoj se ne do ia dalim. Ëndrra ime? Në aspektin personal synoj që me ekipin e Vllaznisë të shpallemi sërish “kampion” dhe të arrij sa më shpejt në Kombëtaren e të rriturave, sepse është një ëndërr e imja”, – ka përfunduar futbollistisja e Kombëtares shqiptare të femrave për grupmoshën e Nën-17-vjeçareve, Arlinda Kodra.
