ASNN – Federata Shqiptare e Futbollit (FSHF) ka organizuar paraditen e kësaj të shtune hedhjen e shortit për edicionin e ri të Kampionatit Kombëtar të Femrave në futboll. Në shortin e zhvilluar në mjediset e Stadiumit “Arena Kombëtare” ishin të pranishëm shefi i Departamentit të Garave në FSHF, Marjus Sulejmani, specialisti Endi Hyka, futbollistja e Tiranës, Katerina Simoni, si edhe përfaqësuesit e klubeve të futbollit të femrave, të cilët u njohën me kalendarin për 20 javët e sezonit 2021-2022.
Ky edicion i ri kampionatit të futbollit të femrave, që nis më 2 tetor ka pësuar disa ndryshime. Ekipi i Bilisht Sport nuk do të jetë pjesë e këtij kampionati, ndërsa ekipi i AAS-së në Shkodër ka marrë emrin “Atletik Club” dhe ekipi i Juban Danjës do të mbajë emrin e ri “Murlan”. Kampionati është i përbërë nga 11 skuadra dhe do zhvillohet në dy faza, me çdo skuadër që do të luajë 21 ndeshje. Pas hedhjes së shortit, u prononcuan edhe përfaqësues të klubeve të pranishëm në sallën e konferencave.
Përfaqësuesi i klubit të Atletik Club komentoi shortin ndërsa e konsideroi si pozitive rritjen e futbollit të femrave në vend. “Shorti besoj se na favorizon në 2-3 javët e para, sepse janë ekipe që kemi luajtur edhe vjet dhe besoj se do bëjmë një nisje të mbarë të kampionatit të ri, – ka thënë ai. Përderisa jemi një ekip që jemi krijuar së fundmi, nuk mund të vendosim objektiva madhore, por shpresojmë që me punë do të arrijmë disa gjëra të mira.”
Ai ka vlerësuar më pas edhe ecurinë e futbollit të femrave në Shqipëri, duke thënë: “Ka një rritje pozitive, duke pasur parasysh edhe investimet që po bën FSHF-ja, besoj se është një motiv më tepër për vajzat që të vazhdojnë futbollin. Një mesazh për të gjithë, futbolli nuk është vetëm për djem, por edhe për vajzat, jo vetëm te ne, por në të gjithë botën dhe shpresoj që të angazhohen sa më shumë, sepse është për të mirën e shëndetit mbi të gjitha”.
Java e parë do të luhet më 2 tetor dhe këto janë çiftet:
Vllaznia – Murlani
Atletik Club – Skënderbeu
Apolonia – Partizani
Kinostudio – Tirana
Lushnja – Teuta
Tirana AS (pushim)
Kalendari i plotë i edicionit 2021-2022:
https://fshf.org/wp-content/uploads/2021/09/Kalendar-Femra-2021-2022.pdf
