ASNN – Federata Shqiptare e Futbollit (FSHF) ka organizuar këtë të premte hedhjen e shortit për edicionin e dytë të Kampionatit Kombëtar të Futbollit “5 X 5” për zonën e Tiranës që do të nisë në javën e parë të muajit tetor. Në shortin e hedhur në mjediset e Stadiumit “Arena Kombëtare”, që u drejtua nga përfaqësuesit e Drejtorisë së Futbollit Amator në FSHF, Jurgen Demneri dhe Lysien Nurishmi, u përcaktua kalendari i plotë me të gjitha ndeshjet e këtij sezoni për zonën e kryeqytetit.
Në këtë edicion të dytë të kampionatit 5 X 5 në Tiranë do të marrin pjesë 57 skuadra, të ndara në 6 grupe, që do të luajnë me sistem vajtje-ardhje dhe që do të shpallin më pas fituesin e kryeqytetit përmes fazës së “play-off”-it. Në hedhjen e shortit ishin të pranishëm përfaqësues të skuadrave, të cilët kanë mësuar edhe kalendarin e kampionatit. Dy prej tyre janë shprehur të lumtur për zhvillimin e kësaj veprimtarie, pasi sporti është një nga mënyrat më të mira për të mbajtur trupin në formë.
“Marrim pjesë për herë në këtë veprimtari dhe mendoj që do të jetë një përvojë e bukur, – thotë njëri nga përfaqësuesit e skuadrave. – Është një veprimtari shumë e bukur që na pëlqen dhe prandaj vendosëm të marrim pjesë. Sporti ka një ndikim goxha të madh në shëndet, na mundëson edhe ne të rinjve që të merremi me një aktivitet fizik, pasi përveç angazhimeve të tjera si puna dhe shkolla mund të merremi me një aktivitete fizik. Kështu që kjo është një mundësi e mirë për ne.”
Ndërsa një tjetër përfaqësues ka shfrytëzuar rastin për t’u bërë një apel të gjithë të rinjve që të merren me futboll e të mos humbasin kohën kot nëpër kafene. “Ky është sezoni i dytë për ne që marrim pjesë, shpresojmë që të ketë gjithmonë e më shumë skuadra, – ka thënë ai. – U bëjmë thirrje të rinjve që të mos rrinë nëpër kafene, por të vijnë e të luajnë futboll, sepse bën mirë edhe për shëndetin. Gjithashtu, uroj që ekipi më i mirë të fitojë”.
