ASNN – Të shtunën pasdreke, Egnatia dhe Laçi janë ndarë në paqe në Rrogozhinë, në një barazim pa gola, në takimin e vlefshëm për javën e 23-të të Kategorisë Superiore. Të dyja skuadrat kërkonin ta fitonin, me kurbinasit që provuan më shumë në pjesën e parë. Në të dytën u zgjuan dhe rrogozhinasit, të cilët humbën një 11-metërsh në minutën e 63-të, por Spahiu u ndal nga Dajsinani. Kështu Egnatia vazhdon në vendin e parë me 48 pikë, ndërsa Laçi në të gjashtin me 28 pikë.
Laçi ka marrë kështu rezultatin e 8-të pozitiv radhazi, këtë herë duke ndalur Egnatian në barazimin pa gola në Rrogozhinë. Meritë edhe e portierit Dajsinani që priti një 11-metërsh, ndërkohë që laçianët ishin skuadra më kërkuese në fushë. Kurbinasit ishin në çdo çast të gatshëm të sulmonin e mund të kishin shënuar në dy raste, por Prodani shpërdoroi një mundësi duke gjuajtur jashtë, ndërsa Qato u ndal nga shtylla në minutën e 28-të.
Ky ishte momenti më i rrezikshëm për të dyja skuadrat në pjesën e parë. Pjesa e dytë shfaq të njëjtën tablo si e para, me Egnatian ndoshta të befasuar nga iniciativa e Laçit që gjithmonë dilte në sulm me forca të shumta. Sidoqoftë, as miqtë nuk arritën të krijonin raste të pastra. Mundësia më e mirë e gjithë ndeshjes vjen për vendasit, në minutën e 64-t, kur Montenegro pengohet brenda zonës nga Dajko dhe gjyqtari bën shenjë nga pika e bardhë.
Spahiu merr përsipër ekzekutimin dhe gjuan nga e majta e Dajsinanit, por portieri i Laçit i kupton krahun dhe ndalon topin. Në minutat e fundit Qato del në një kundërsulm, por gjuan keq pasi hyn në zonë nga e majta. Ishte rasti i fundit dhe skuadrat ndahen në paqe, në atë që është i dyti radhazi për skuadrën rrogozhinase dhe i 3-ti radhazi për skuadrën vendase.
