ASNN – Kastrioti-Dinamo të shtunën (14:00) dhe Pogradeci-Lushnja, të dielën (14:00), dy duelet e përzgjedhura. Kastrioti-Dinamo, që luhet të shtunën, duke nisur nga ora 14:00 dhe Pogradeci-Lushnja, të dielën, që luhet gjithashtu duke nisur nga ora 14:00, janë dy përballjet më të spikatura të Kategorisë së Parë. Dhe këto janë edhe dy duelet e përzgjedhura të javës së 16-të, që do të sillen për sportdashësit drejtpërdrejt në Rrjetin e Radio-Televizionit Shqiptar në kanalin RTSH Sport.
Kategoria e Parë e Kampionatit Kombëtar të Futbollit luan në fundjavë ndeshjet e javës së saj të 16-të, të cilat janë shtrirë në dy ditë, të shtunën dhe të dielën. Kështu, në grupin A apo grupin e Veriut, 3 takimet e para luhen të shtunën, duke nisur nga ora 14:00. Egnatia pret në Rrogozhinë Tërbunin e Pukës, ndërsa Erzeni është mysafir në Peshkopi, për t’u përballur me Korabin.
Ndërkaq, në takimin më të spikatur të javës, që do të sillet për sportdashësit drejtpërdrejt në Rrjetin e Radio-Televizionit Shqiptar në kanalin RTSH Sport, Kastrioti pret në Krujë Dinamon në përballjen që nis në ora 14:00. Kjo është një sfidë midis skajesh, pasi krutanët kryesojnë të shkëputur renditjen e grupit A, me 30 pikë të marra në 14 ndeshje, 5 më tepër sesa ndjekësja më e afërt, Besëlidhja, dhe 8 më tepër sesa Korabi i vendit të 3-të e Burreli i vendit të 4-t.
Kurse dinamovitët mbyllin renditjen me vetëm 9 pikë të marra në 15 ndeshje, por kanë bërë një paraqitje të mirë në ndeshjet e para të 2020-ës. Java e 16-të e Grupit të Veriut mbyllet të dielën, me duelin e Lezhës, Besëlidhja-Burreli, ndërsa në grupin B, apo grupin e Jugut, 3 takimet e para luhen të shtunën, duke nisur nga ora 14:00. Kështu Elbasani pret Turbinë e Cërrikut në derbin e prefekturës, ndërsa Iliria e Fushë-Krujës viziton Orikumin, për t’u ndeshur me vendasit.
Devolli pret Shënkollin, ndërsa dy takimet e tjera të javës së 16-të të grupit të Jugut luhen të dielën dhe Besas pret në Kavajë Apoloninë kryesuese. (Pamje nga Lushnja-Pogradeci) Takimi më i spikatur i javës është ai midis Pogradecit dhe Lushnjës, që luhet të dielën, duke nisur nga ora 14:00 dhe do të sillet për për sportdashësit drejtpërdrejt në Rrjetin e Radio-Televizionit Shqiptar në kanalin RTSH Sport.
