ASNN – Gjen fitoren pas 15 vitesh ndaj Partizanit. Dinamo fitonme përmbysje ndaj të kuqve në takimin e së dielës. Pas takimit të parë, të luajtur pasdreke, të shtunën në mbrëmje janë luajtur dy takime të tjetra, të vlefshme për javën e 23-të të Superiores dhe në Stadiumin “Niko Dovana të Durrësit janë vënë përballë njëra-tjetrës Dinamo dhe Partizani. Të kaltërit e trajnerit Dritan Mehmeti kërkonin fitoren për t’iu afruar edhe më tepër 4-shes së kreut të renditjes, ndërsa të kuqtë e homologut Orges Shehi për të përfituar nga frenimi i Egnatias pasdreke.
Ndonëse Zabërgja jep sinjalin e parë në portën e të kuqve me një gjuajtje me kokë në minutën e 3-të dhe Mba është kundërpërgjigjur me një goditje nga larg brenda të njëjtës minutë, në të 10-ën është një goditje këndi për të kuqtë dhe pas një rrëmuje në zonën dinamovite, ka përfituar Mba, i cili e ka dërguar topin në rrjetë. Ndonëse Dinamo reagon me Zabërgjën, që ndalet nga portieri Alban Hoxha në minutën e 20-të, menjëherë më pas Partizani gjen edhe golin e dytë, me anë të Carës, por pas ndërhyrjes së Sistemit të Ndihmësgjyqtarit të Videos (VAR) ka anulluar gjithçka, për një ndërhyrje të parregullt në fillim të aksionit të Mbasë në dëm të Zabërgjës.
Me epërsinë minimale të Partizanit do të mbyllet pjesa e parë në Durrës. Në atë të dytë, është Dinamo që gjen golin e barazimit në minutën e 56-t. Marku godet nga larg dhe topi nuk është zotëruar siç duhet nga Hoxha dhe aty ka përfituar Kaçorri, i cili nuk e ka patur të vështirë të dërgojë topin në rrjetë. Dhe 3 minuta para fundit, Dinamo do të përmbysë shifrat, teksa një aksion i bukur, i nisur nga Zabërgja dhe i finalizuar me sukses nga Lorenco Vila, është anuluar fillimisht nga kryesori pas sinjalizimit të anësorit për pozicion jashtëloje.
Por më pas është konfirmuar si një gol i rregullt nga VAR-i. Ndonëse Dinamo do t’i luajë 3 minutat e fundit të kohës së rregullt dhe ato 6 shtesë me 10 lojtarë, pas ndëshkimit me karton të kuq të Vilës, që mori të dytin e verdhë pasi hoqi fanellën në festimin e golit të dytë. ajo e mbron fitoren 2-1, që është e para në 15 vitet e fundit ndaj Partizanit.
