ASNN – Sikundër ishte njoftuar, trajneri i Kombëtares shqiptare, Xhovani De Biazi, ka dalë në një konferencë për shtyp të mërkurën në mesditë, ku ka sqaruar listën përfundimtare të futbollistëve të përfshirë për në fazën finale të “Euro 2016”-ës, si dhe për ata që janë lënë jashtë saj. Numri një i stolit të kuqezinjve, ka thënë se vendimet janë të tija dhe se ai i ka studiuar mjaft mirë futbollistët që ka marrë dhe ata që i ka larguar.
Milot Rashica, Amir Rrahmani, Herolind Shala dhe Berat Gjimshiti janë katër lojtarët të cilët nuk do të jenë pjesë e ekipit kombëtar në fazën finale të Evropianit “Francë 2016”. Futbollistët janë njoftuar për këtë vendim nga vetë trajneri Xhovani De Biazi të martën në mbrëmje. Drejtuesi italian i kuqezinjve është shfaqur tepër i tensionuar në konferencën për shtyp zhvilluar të martën në mesditë në Bad Valtersdorf teksa ka sqaruar arsyet e këtij vendimi.
“Ishte shumë e vështirë të merrja një vendim të tillë, – ka pohuar ai. – Por e theksoj se për të arritur deri këtu kemi bërë vlerësime të thella dhe jo sipërfaqësore. Ju shpjegova futbollistëve arsyet dhe se çfarë më shtyu t’i çoja në shtëpi. As ata nuk e dinin që do të iknin, gjithçka erdhi në bazë së saj që kanë bërë deri këtu dhe në bazë të bindjeve të mia se kush është më i dobishëm në Francë. Zgjedhjet janë të motivuara për arsye teknike dhe fizike.”
“Mora ata që mendoj se janë më të mirët dhe më të gatshëm për të ndihmuar skuadrën në Evropian”, – ka theksuar De Biazi, i cili, më tej ka shpjeguar shkurt motivet e largimit për Gjimshitin dhe Rashicën. “Gjimshiti ka një vit që nuk luan, ndaj nuk është në formë, – ka thënë 60-vjeçari. – Rashica nuk ka luajtur shumë me ne, por kam besim te talenti i tij dhe në të ardhmen do të jetë pjesë e kombëtares.” Trajneri nuk ka pranuar të japë shpjegime për Shalën dhe Rrahmanin, duke thënë se ua ka shpjeguar atyre vetë personalisht arsyet e largimit.
