ASNN – Xherri Sloun ndërroi jetë në moshën 78-vjeçari, e drejtoi ekipin për 23 vjet. Bota e basketbollit amerikan është në zi. Xherri Sloun, një nga trajnerët më të vlerësuar në 30 vitete e fundit në Shtetet e Bashkuara, është ndarë nga jeta në moshën 78-vjecare, teksa vuante nga Parkinsoni dhe nga humbja e kujtesës.
Lajmin e ka bërë të ditur të shtunën në orët e para të mëngjesit skuadra e Jutah Xhezit, të cilën Slouni e udhëhoqi për plot 23 vjet, nga viti 1988, deri në 2011-ën, duke e dërguar në dy finale radhazi të NBA-së, më 1997-ën dhe 1998-ën, të dyja të humbura përballë një kundërshtari të jashtëzakonshëm si Çikago Bulls e udhëhequr nga legjendari Majkëll Xhordan. “Xherri Sloun do të jetë gjithnjë sinonim i Jutah Xhezit.
Do të jetë gjithnjë pjesë e jona” – kanë shkruar drejtuesit e skuadrës amerikane, në një komunikatë për shtyp. “Me të si trajner, Jutah Xhezi ka fituar dy herë titullin e Konferencës Perëndimore të NBA-së dhe në atë skuadër, luanin edhe Xhon Stoktoni e Karl Malon.”
“Ashtu si ata, edhe Xherri Sloun “mishëronte” shpirtin e Jutah Xhezit”, – përfundon komunikata e skuadrës amerikane të basketbollit. Interesant është fakti se, si basketbollist, ai kishte spikatur si një nga mbrojtësit më të mirë pikërisht për Çikago Bulls, ekipin që më vonë do ta drejtonte për 3 sezone, para se të kalonte tek Jutah Xhezi.
Për botën e sportit amerikan kjo është humbja e dytë e rëndë në harkun e dy javëve, duke qenë se më 4 maj, u nda nga jeta në moshën 90-vjecare Don Shula, trajneri që ka fituar më shumë trofeun në historinë e Ligës së futbollit amerikan, NFL-së.
