ASNN – Takim i parë i Eliminatoreve të Botërorit 2023, drejtpërdrejt në RTSH 3 (19:30). Basketbolli dhe Kombëtarja kuqezi e koshit rikthehet në parketin ndërkombëtar me ndeshjet eliminatore të Botërorit 2023 dhe, sikundër me çdo veprimtari sportive madhore, kombëtare apo ndërkombëtare, emocionet e 6 ndeshjeve të saj do të vijnë për sportdashësit drejtpërdrejt në Rrjetin e Radio-Televizionit Shqiptar.
Pas shortit të hedhur, Shqipëria do të përballet në grupin A me Portugalinë, Qipron dhe Bjellorusinë. Takimi që do të ngrejë siparin e këtij grupi eliminator është ai që do të luhet të enjten në mbrëmje në Portugali, përballë përfaqësueses vendase.
Kjo ndeshje, që luhet në Albufeira, me orën 18:30 me orën portugeze dhe 19:30 me orën e Tiranës, do të sillet për sportdashësit drejtpërdrejt në kanalin RTSH 3 të platformës së transmetuesit publik, por edhe në aplikacionin “RTSH Tani”. Kombëtarja kuqezi, e cila drejtohet nga trajneri Afrim Bilali, është grumbulluar prej mëse një jave dhe ka zhvilluar stërvitjen në Arenën Sportive “Dhimitraq Goga” të Durrësit.
Të mërkurën, kuqezinjtë e koshit janë nisur drejt Portugalisë, atje ku kanë mbërritur në mbrëmje.
