ASNN – Ish-lojtari i famshëm i humbet jetën në një aksident me helikopter në Kaliforni. Bota e basketbollit, por edhe e sportit në përgjithësi është tronditur sonte, pasi ish-lojtari i njohur amerikan, Kobi Brajënt, ka humbur të dielën jetën në moshën 41-vjeçare. Legjenda e NBA-së amerikane, së bashku me një nga vajzat e tij, ishte midis të paktën 5 viktimave të shkaktuara nga rrëzimi i një helikopteri.

Sipas burimeve mediatike, lojtari ikonë i Los Anxheles Lejkërs po udhëtonte me 3 persona të tjerë një helikopter privat , i cili u rrëzuar në një zonë pranë Kalifornisë në Shtetet e Bashkuara të Amerikës. Ndonëse ende nuk ka një informacion të konfirmuar, mendohet që të paktën 5 veta të kenë humbur jetën në këtë aksident ajror dhe asnjë nga pasagjerët në bord apo pilotët nuk kanë mbijetuar.

Një hetim mbi këtë çështje po zhvillohet me ritme të shpejta, por, sipas dëshmitarëve, helikopteri ka shpërthyer në flakë në ajër, përpara se të përplasej në tokë. Kobi Brajënt lë pas bashkëshorten e tij, Vanesën dhe 3 vajzat e tjera të tyre. Por vdekja e tij ka shkaktuar tronditje dhe dëshpërim në botën e basketbollit, me një numër të madh lojtarësh të njohur që ende nuk e besonin lajmin e hidhur.

Kobi Brajënt, i cili u tërhoq nga basketbolli në vitin 2016, i kaloi 10 sezonet e para me nr. 8 dhe 10 të tjerat me Nr. 24 në fanellë, dy numra që Los Anxheles Lejkërs i ka hequr nga përdorimi në nderim të tij.