ASNN – Edhe rivalja tjetër bregdetare, Teuta, mposht të kuqtë kryeqytetas, Partizanin, 83-60. Pas përfundimit të sezonit të rregullt dhe zhvillimit të Superkupës, ka nisur të dielën edhe “play-off”-i për titull i nivelit më të lartë të Kampionatit Kombëtar të Basketbollit për Meshkuj, Superligës, dhe dy ekipet durrsake i kanë fituar dy përballjet e parë ndaj dy rivaleve të kryeqytetit.

Rrjeti i Radio-Televizionit Shqiptar ka sjellë për sportdashësit drejtpërdrejt të dielën një prej prej dy ndeshjeve, sfidën e zhvilluar në Arenën Sportive “Dhimitraq Goga” në Durrës, midis Goga Basketit dhe Tiranës. Skuadra vendase, e drejtuar nga trajneri i ri Melzin Lazimi, e cila e mbylli sezonin e rregullt e shkëputur në krye të renditjes, ka kryesuar gjatë gjithë lojës, shpeshherë deri në 15 pikë epërsi.

Por në fund është kënaqur me një fitore në shifrat 81-74. Pjesa e parë e ndeshjes është fituar nga Goga Basket me shifrat 23-20, ndërsa ajo që praktikisht ka vulosur fatin e këtij takimi, ka qenë pjesa e dytë, të cilën ekipi vendas e fiton me shifrat 18-10 dhe kësisoj shkon në pushimin e madh midis dy gjysmave duke kryesuar me 11 pikë epërsi, 41-30.

Kjo epërsi do të rezultojë e mjaftueshme për skuadrën vendase, pasi Tirana do të reagojë në pjesën e 3-të, duke e fituar atë 20-17 dhe duke e shkurtuar hendekun e pikëve në 50-58. Bardheblutë do të luajnë si të barabartë edhe në 10-minutëshin e 4-t dhe të fundit, të cilin madje e fitojnë 24-23, por kjo nuk e rrezikon fitoren e Goga Basket, e cila merr kështu me vete një fitore për ndeshjen e dytë.

Ndeshje që do të luhet në Sallën Sportive “Fahrie Hoti” në kryeqytet më 24 mars 2019. Në takimin tjetër të zhvilluar në Durrës, Teuta ka fituar takimin e parë, 83-60 ndaj Partizanit.

Kampionati Kombëtar

i Basketbollit – Meshkuj

Faza e “play-off”-it

Ndeshjet gjysmëfinale:

Takimet e para:

Të dielën 21 prill 2019:

Goga Basket – Tirana          81-74

(23-20, 18-10, 17-20, 23-24)

Teuta – Partizani                   83-60

(19-18, 22-10, 27-17, 15-15)

Takimet e dyta:

Të mërkurën, 24 prill 2019:

Tirana – Goga Basket          (18:00)

Partizani – Teuta                   (18:00)

Takimet e 3-ta:

(Nëse nevojiten)

Të dielën, 28 prill 2019:

Goga Basket – Tirana

Teuta – Partizani