ASNN – Tek femrat, veprimtaria e përbashkët mbarëkombëtare e basketbollit midis Shqipërisë dhe Kosovës, Liga Unike ka funksionuar shumë mirë, por nuk mund të thuhet e njëjta gjë për meshkujt. Në një lidhje të drejtpërdrejtë nga Prishtina me Rrjetin e Radio-Televizionit Shqiptar, Presidenti i Federatës së Basketbollit të Kosovës (FBK), Arben Fetahu, është pyetur pse ka ardhur ky ngërç dhe pse nuk ka mundur të zhvillohet edhe turneu i meshkujve ashtu si edhe ai i femrave.
“Në realitet, kemi patur një situatë të palakmueshme vitin e kaluar, ku ekipet e Shqipërisë nuk ishin të gatshme të marrin pjesë në një ligë të plotë dhe përkundër përpjekjeve që bëmë bashkarisht, ne si Federatë e Basketbollit të Kosovës (FBK), por veçanërist Federata Shqiptare e Basketbollit (FSHB), nuk arritëm të siguronim numër të mjaftueshëm të klubeve të Shqipërisë për të marrë pjesë në garë dhe na u desh ta pezullojmë garën për një vit”, – ka pohuar ai.
“Megjithatë, pozitiv është fakti që ekipet kanë konfirmuar dëshirën e tyre për të marrë pjesë në këtë veprimtari për këtë sezon dhe për sezonet e ardhshme, por ka qenë shumë vonë që të organizohet liga e plotë për meshkujt, – ka vijuar Fetahu. – Kjo edhe për shkak të kalendarit mjaft të ngjeshur të garave që kemi aktualisht në Federatën e Basketbollit të Kosovës, ndaj nuk kemi mundur ta zhvillojmë Ligën Unike si një ligë të plotë.”
“Dhe ajo që jemi pajtuar bashkarisht me FSHB-në, edhe me klubet pjesëmarrëse, natyrisht, sepse ne duhet si palë pjesëmarrëse me interes që i kemi, ne duhet të konsultohemi edhe me to, ne jemi pajtuar që këtë vit ta bëjnë në formën e një turneu të kupës, – ka sqaruar kreu i FBK-së. – Kurse prej sezonit të ardhshëm, prej shtatorit, të vijojmë me atë që kishim parashikuar fillimisht, pra, të kemi garë të plotë, edhe tek meshkujt, edhe tek femrat.”
Kësisoj, meshkujt të zhvillojnë një “Tetëshe finale” në mars në Vlorë dhe Fetahu ka zbuluar se çfarë pret organizimi që ai drejton, nga kjo veprimtari. “Pritshmëritë dhe shpresat janë që të kemi një organizim të mirë, që të kemi një garë të mirë dhe më e nxehtë, – ka theksuar ai. – Besoj që këtë vit do të jetë një garë më e përafërt edhe tek meshkujt, pasi kam vërejtur se ka patur lëvizje mjaft pozitive tek klubet shqiptare. Duhet pranuar se tek basketbolli i meshkujve, Kosova është më mirë, më përpara.”
“Kjo ka ardhur për shkak të përparësive buxhetore që ka, për shkak të klubeve mjaft më të konsoliduara, qoftë financiarisht, qoftë në aspektin administrativ dhe strukturor, – ka pohuar Presidenti i koshit “dardan”. – Pra, klubet e Kosovës kanë epërsi, por nga ajo që po shoh sivjet nga Superliga e Shqipërisë, është se ka klube të mira, që kanë punuar mirë dhe besoj që do ta kemi një garë të ngushtë edhe gjatë muajit mars në këtë turne”, – ka përfunduar Arben Fetahu.
