ASNN – Kreu i atletikës shqiptare vlerëson Luiza Gegën, Franko Burrajn dhe Izmir Smajlaj në turneun e Gadishullit. Shqipëria mori pjesë me disa sportistë në Kampionatit Ballkanik të Sallave të Mbyllura, që u mbajt të shtunën në Stamboll, dhe Presidenti i Federatës Shqiptare të Atletikës, Gjergj Ruli, është mjaft i kënaqur me paraqitjen në një veprimtari që ka kapërcyer kufinjtë e rajonit.
Natyrisht, kulmi i suksesit ishte mbrojtja e kurorës së kampiones së Gadishullit nga Luiza Gega në garën e 3,000 metrave për femra. Ruli ka veçuar edhe thyerjen, për herë të dytë brenda pak javësh, të rekordit të garës së 400 metrave nga atleti i ri shkodran, Franko Burraj. Kreu i organizmit që qeveris atletikës shqiptare është optimist edhe për atletin e kërcimit të gjati, Izmir Smajlajn.
