ASNN – Atletja vijon stërvitjen në Kenia, në program, disa gara në salla të mbyllura para “Tokio 2020”. Atletja shqiptare, Luiza Gega, e ka hedhur vështrimin drejt Olimpiadës së verës, që do të mbahet në kryeqytetin e Japonisë, Tokio. Viti i ri e ka gjetur atë në skajin veri-lindor të Kenias, atje ku ajo gjendet që prej 7 dhjetorit të vitit të shkuar. Sipas informacionit që ka përcjellë trajneri Stërmasi, nëse kjo fazë stërvitore do të shkojë mirë, atëherë Gega synon pjesëmarrjen në disa gara në salla të mbyllura, natyrisht, duke synuar ruajtjen e formës përtej motit të ftohtë.
Viti i ri e ka gjetur atleten shqiptare më të spikatur të të gjitha kohërave, Luiza Gegën, në skajin veri-lindor të Kenias, atje ku ajo gjendet që prej 7 dhjetorit të vitit të shkuar. Një javë më pas, më 15 dhjetor, atletes i është bashkuar në kampin stërvitor të Itenit në vendin afrikanolindor edhe trajneri i saj Taulant Stërmasi, nën drejtimin e së cilit ajo do të vijojë të stërvitet deri më 27 janar, kur do të kthehen në Shqipëri, për të vijuar këtu përgatitjet për Olimpiadën e verës në kryeqytetin e Japonisë, Tokio.
Sipas informacionit që ka përcjellë trajneri Stërmasi, nëse kjo fazë stërvitore do të shkojë mirë, atëherë Gega synon pjesëmarrjen në disa gara në salla të mbyllura, natyrisht, duke synuar ruajtjen e formës përtej motit të ftohtë. Kështu, teksa mbetet për t’u konfirmuar, në fund të janarit ose në fillim të shkurtit, 31-vjeçarja do të marrë pjesë në garën e 3,000 m në Mitingun e Karlsruhes në Gjermani. Më pas, më 15 shkurt, Gega do të konkurrojë në garën e 3,000 m në Kampionatin Ballkanik të Atletikës në Salla të Mbyllura, që do të mbahet në Turqi, në Stamboll.
Ndërsa, nëse gjithçka do të shkojë mirë, atletja shqiptare do të marrë pjesë në Botërorin e Sallave të Mbyllura, që do të mbahet nga data 13, deri më 15 mars 2020 në Nanxhing të Kinës. Më pas, Luiza Gega do të përqendrohet tek përgatitjet përfundimtare për Olimpiadën e Tokios, ku ajo do të synojë të përsërisë suksesin e Botërorit të shkuar, ku u bë e para shqiptare që arrin në finalen e një gare, siç ishte ajo e 3,000 m me pengesa, në mbyllje të së cilës u rendit e 9-ta në planet.
Klikoni videon e mëposhtme për kronikën e plotë:
