ASNN – Luiza Gega e tregoi dhe një herë veten se është “xhevahir” i atletikës shqiptare. Në Kampionatin Ballkanik të Sallave të Mbyllura që u zhvillua të shtunën në Stamboll, atletja shqiptare zuri vendin e parë në 3000 metra, duke merituar plotësisht medaljen e artë dhe duke i dhënë nder Shqipërisë me triumfin e saj. Ishte një garë ku Gega nuk pati rivalitet, pasi sportistja që ishte më afër saj e mbylli me 20 sekonda më shumë garën e 3000 metrave.
Sportistja shqiptare shënoi kohën 8 minuta 56 sekonda e 04 të qindtat. Ishte një rezultat mjaft i mirë për atleten Gega, e cila konfirmohet dhe një herë tjetër si kampione e Ballkanit dhe një pretendente në këtë garë dhe në rang evropian. Duhet thënë se Luiza Gega e dominoi këtë garë pa pasur kurrfarë rivaliteti, madje në xhiron e fundit ajo kaloi për së dyti dy atlete të tjera që e kishin nisur garën së bashku. Ishte një garë perfekte, e realizuar në mënyrën më të mirë të mundshme siç Luiza Gega di.
Një garë që e konfirmon shtatvoglën e atletikës së Shqipërisë si kampionen e padiskutueshme të Ballkanit dhe Evropës Juglindore. Kjo është një arritje e madhe për sportisten, trajnerin e saj Taulant Stërmasi, Federatën Shqiptare të Atletikës dhe njëherësh sportin shqiptar në tërësi. “Nuk është surprizë për mua, – theksoi Luiza Gega për mediat sportive shqiptare pas garës, – sepse në 6 pjesëmarrje që kam në Kampionatin Balkanik kam marrë 6 medalje ari.”
“Vij nga një test 6-javor dhe ndihem në formë, – ka vijuar ajo. – Kjo garë shërben edhe si test për mua për sfidat e ardhshme. Tashmë objektiv është Evropiani në Gllasgou. Më vjen mirë për garën dhe suksesin, por më penalizoi mungesa e konkurrencës, pasi, nëse do të kisha rivalitet mund të thyeja edhe rekordin kombëtar, megjithëse specialiteti im mbetet gara e 3,000 metrave me pengesa.” Ky rezultat, e ndihmon sportisten moralisht për sfidat e ardhshme.
Aty ku në qendër të vëmendjes janë Kampionati Evropian dhe ai Botëror, ku do të tentohen rezultate të larta për të kapur normën olimpike dhe për të përmbushur me sukses objektivat që kanë sportisti, trajneri dhe FSHA-ja.
