ASNN – Atletja shqiptare Luiza Gega, e ka humbur për vetëm 32 të qindtat e sekondës podiumin e garës së 3,000 metrave me pengesa në Evropianin e Berlinit. Dhe, në një postim në profilin e saj në rrjetin social, “Facebook”, ajo shkruan se është e mërzitur, sepse besonte shumë të ishte në zonën e medaljeve por fati nuk ishte me të të dielën. “Sidoqoftë, ndihem vërtet shumë krenare për çfarë kam arritur këtë vit”, – shkruan rekordmenia kuqezi.
E mërzitur, natyrisht, por edhe me kokën lart, sepse edhe një vend i 4-t në Evropian për një vend si Shqipëria e për më tepër për gjendjen ku ndodhet atletika shqiptare është prapëseprapë një arritje. Kështu e ka mbyllur sportistja shqiptare, Luiza Gega, Evropianin e Atletikës që uli të dielën siparin në kryeqytetin e Gjermanisë, Berlin. Gega nuk arriti ta merrte vendin e 3-të dhe podiumin për vetëm 32 të qindtat e sekondës.
Dhe, në një postim në profilin e saj në rrjetin social, “Facebook”, ajo shkruan: “Kampionati Evropian “Berlin 2018” u mbyll në vendin e katërt dhe pse luftova gjer në fund për medalje, isha kaq afër, por nuk arrita dot ta marr.” “Të them të drejtën, jam e mërzitur, sepse besoja shumë të isha në zonën e medaljeve por fati nuk ishte me mua sot”, – vijon shtatshkurtëra kuqezi, e cila erdhi në finish në një betejë me norvegjezen Grovdal.
“Gjithsesi, ndihem vërtet shumë krenare për çfarë kam arritur këtë vit, – vijon ajo. Rekord kombëtar, rekord Mesdheu, kampione Mesdheu dhe vendi i 4-t në Kampionatin Evropian dhe për më tepër jam e shëndetshme dhe ndihem vërtet e fortë dhe në formë për ato që pres të vijnë në vazhdim.” Më tej, Kampionia e Mesdheut në garën e 3,000 metrave me pengesa ka falënderuar sidomos trajnerin e saj, Taulant Stërmasi. “Dua të falënderoj të gjithë ato që mbështeten këtë vit të suksesshëm e të rëndësishëm të karrierës sime, sigurisht familjen time si dhe gjithë ato që më urojnë e motivojnë pa fund. Faleminderit!” e mbyll postimin e saj atletja Luiza Gega.
